Janubiy Koreya bilan liftsozlik sohasida yirik investitsiya loyihasi muhokama qilindi
2026-10-20 16:35:00 / Yangiliklar
Janubiy Koreya bilan liftsozlik sohasida yirik investitsiya loyihasi muhokama qilindi
Andijon viloyati delegatsiyasi Janubiy Koreyaning «U&K Global Co.,LTD.» va «MODEUN ELEVATOR CO., LTD.» kompaniyalari vakillari bilan uchrashuv o‘tkazdi.
Unda viloyatda zamonaviy liftsozlik sanoatini yo‘lga qo‘yish, xorijiy investitsiyalarni jalb etish va yuqori qo‘shilgan qiymatga ega mahsulotlar ishlab chiqarishni tashkil etish masalalari ko‘rib chiqildi.
Muzokaralarning asosiy mavzusi umumiy qiymati 200 million AQSH dollariga teng bo‘lgan «Andijon–Koreya lift klasteri» ni tashkil etish loyihasi bo‘ldi.
Mazkur tashabbus doirasida zamonaviy liftlar, eskalatorlar va ularning butlovchi qismlarini ishlab chiqarishni yo‘lga qo‘yish rejalashtirilgan.
Loyihaning muhim yo‘nalishlaridan biri ishlab chiqarish jarayonlarini mahalliylashtirish hisoblanadi. Xususan, mahalliylashtirish darajasini kamida 70 foizga yetkazish ko‘zda tutilmoqda.
Bu esa kelgusida zarur butlovchi qismlarni mahalliy korxonalarda ishlab chiqarish, import o‘rnini bosuvchi mahsulotlar ulushini oshirish hamda mahalliy sanoat kooperatsiyasini rivojlantirish uchun zamin yaratishi mumkin.
Loyihaning amalga oshirilishi Andijonda mashinasozlik va sanoat ishlab chiqarishini yangi bosqichga olib chiqish, zamonaviy texnologiyalar va xorijiy tajribani mahalliy ishlab chiqarishga tatbiq etish, shuningdek, yangi ish o‘rinlarini yaratish nuqtayi nazaridan muhim ahamiyatga ega.
Uchrashuvda loyihaning ishlab chiqarish imkoniyatlari, investitsiyalarni jalb etish va hamkorlikni amaliy bosqichga olib chiqish bilan bog‘liq masalalar muhokama qilindi.
Tomonlarning ushbu yo‘nalishdagi hamkorligi Andijonning sanoat salohiyatini kengaytirish va viloyatda zamonaviy liftsozlik tarmog‘ini shakllantirishga xizmat qilishi kutilmoqda.
Bizning sahifalarimiz:
🕊 Telegram 📱 Instagram
📱 Facebook 🌐 Web