Ijtimoiy ko‘makka muhtoj yoshlar vazirlik mutasaddilari e’tiborida
2024-08-28 13:30:00 / Yangiliklar
O‘tgan davr mobaynida bu yoshlarga har tomonlama ko‘mak ko‘rsatilib, ularning jamiyat hayotida o‘z o‘rinlarini topishlari uchun talay ishlar amalga oshirib kelinmoqda.
Qishloq xo‘jaligi vazirligi ham bu borada faol hisoblanadi. Chunonchi, kuni kecha vazirlik mutasaddilari Toshkent shahar Olmazor tumanining “Eski shahar” mahallasidagi e’tiborga muhtoj 40 nafar yoshlar bilan uchrashdi.
Uchrashuvda yoshlarning ijtimoiy-iqtisodiy muammolarini hal etish va bandligini ta’minlash, kasb-hunarga o‘rgatish va ish bilan ta’minlash, ularga e’tibor va g‘amxo‘rlik ko‘rsatish, qo‘llab-quvvatlash kabi masalalarga e’tibor qaratildi. Ularning muammolari, yashash sharoiti va takliflari atroflicha muhokama qilindi.
Tadbirda ta’kidlanganidek, mazkur yoshlarning har biriga vazirlik mas’ul xodimlari biriktirilib, muammolarini hal etish va ijtimoiy faol hayotga qaytarish choralari ko‘rilmoqda. Bundan tashqari, ularning oila a’zolariga ham turli ko‘rinishdagi yordamlar ko‘rsatilmoqda. Mutasaddilar yoshlardan kunlik xabar olib, ularning masalalarini tahlil qilib, axborot berib turish amaliyoti joriy qilingan.
Bundan tashqari, tadbirda avvalgi ko‘rsatilgan yordamlarning samaradorligi ham sarhisob qilindi. Xususan, sport mashg‘ulotlari uchun yaratib berilgan sharoitlar orqasidan musobaqalarda g‘olib chiqqan yoshlar e’tirof etildi.