O'zbekiston Respublikasi Fanlar akademiyasi

O‘zbekiston Respublikasi Fanlar akademiyasi 2035-yilgacha Fanlar akademiyasini rivojlantirish strategiyasini hamda uni 2027–2035-yillarda amalga oshirish rejasini ishlab chiqish bo‘yicha konsalting xizmatlarini ko‘rsatish uchun to‘rt nafar yuqori malakali xorijiy konsultantni — mustaqil ekspertni jalb etish bo‘yicha ochiq tanlov e’lon qiladi.

Konsultantlar yakka tartibda, har biri alohida fuqarolik-huquqiy shartnoma asosida jalb etiladi. Tanlov to‘rtta alohida yo‘nalish bo‘yicha o‘tkaziladi. Bir nomzod tegishli yo‘nalishning malaka talablariga javob bergan taqdirdagina faqat bitta yo‘nalishga ariza topshirishi mumkin.

Mazkur tanlov ilmiy tashkilotlarni strategik rivojlantirish, ilm-fanni boshqarish tizimini takomillashtirish, inson kapitali va ilmiy infratuzilmani rivojlantirish, xalqaro hamkorlikni mustahkamlash, tadqiqot natijalarini tijoratlashtirish hamda fan, ta’lim va sanoat o‘rtasidagi o‘zaro aloqani kuchaytirishga doir xalqaro ekspert tajribasi va ilg‘or yondashuvlarni jalb etish maqsadida o‘tkazilmoqda.

1. Tanlov e’lon qilinayotgan yo‘nalishlar

• Bosh konsultant

• Strategik rejalashtirish bo‘yicha ekspert

• Fan, texnologiyalar va innovatsiyalar bo‘yicha ekspert

• Monitoring, baholash va tahlil bo‘yicha ekspert

2. Konsultantlarning asosiy vazifalari

Konsultantlar O‘zbekiston Respublikasi Fanlar akademiyasi bilan hamkorlikda yagona ekspertlar jamoasi sifatida faoliyat yuritadi. Lavozimi va mas’uliyat doirasidan kelib chiqib, konsultant quyidagi vazifalarda ishtirok etadi:

• Fanlar akademiyasining joriy holatini, jumladan, boshqaruv tizimi, tashkiliy tuzilma, kadrlar salohiyati, ilmiy infratuzilma, moliyalashtirish, ilmiy natijalar, tijoratlashtirish va xalqaro hamkorlikni kompleks tahlil qilishda;

• yetakchi fanlar akademiyalari va ilmiy-tadqiqot tashkilotlarining xalqaro tajribasi va zamonaviy rivojlanish modellarini tahlil qilishda;

• Fanlar akademiyasining missiyasi, kelajak tasavvuri va strategik qadriyatlarini shakllantirishda;

• Akademiyaning 2035-yilgacha bo‘lgan strategik ustuvorliklari, maqsad va vazifalarini belgilashda;

• Akademiyaning tashkiliy-boshqaruv modelini takomillashtirish bo‘yicha takliflar ishlab chiqishda;

• ilmiy va kadrlar salohiyatini, yoshlar ilmini, ilmiy infratuzilmani, raqamli transformatsiyani va xalqaro hamkorlikni rivojlantirish bo‘yicha takliflar ishlab chiqishda;

• Akademiyaning ilmiy nufuzi va raqobatbardoshligini oshirish bo‘yicha takliflar ishlab chiqishda;

• tadqiqot natijalarini tijoratlashtirish hamda biznes va sanoat bilan o‘zaro hamkorlik qilish bo‘yicha takliflar ishlab chiqishda;

• 2027–2035-yillarga mo‘ljallangan Strategiyani amalga oshirish rejasini, KPI tizimi va monitoring indikatorlarini tayyorlashda;

• yakuniy hujjatlar to‘plami va taqdimot materiallarini tayyorlash, muhokama qilish hamda takomillashtirishda.

3. Nomzodlarga qo‘yiladigan talablar

Ishtirok etish uchun xorijiy fuqarolar — mustaqil konsultantlar, ekspertlar va xalqaro darajadagi mutaxassislar taklif etiladi. Nomzod aynan o‘zi ariza topshirayotgan lavozimga oid malaka talablariga javob berishi kerak.

3.1. Yetakchi konsultant

• Fan, ta’lim, innovatsiyalar, davlat boshqaruvi va/yoki turdosh sohalardagi strategik va/yoki konsalting loyihalarini boshqarish tajribasini o‘z ichiga olgan kamida 15 yillik kasbiy tajriba;

• Ilmiy tadqiqotlarni tashkil etish va boshqarish, innovatsion faoliyat, texnologiyalar transferi hamda ITTKI natijalarini tijoratlashtirish sohasida ekspert darajasidagi bilimlar;

• Barqaror rivojlanish, ilg‘or texnologiyalarni joriy etish, raqamli transformatsiya va xalqaro ilmiy hamkorlikni rivojlantirishga qaratilgan loyihalarni o‘z ichiga olgan holda, ilmiy-tadqiqot tashkilotlarini rivojlantirish strategiyalarini ishlab chiqish bo‘yicha loyihalarni boshqarish tajribasi;

• Siyosatni ishlab chiqish, amalga oshirish va baholash bo‘yicha loyihalarda Jahon banki, BMTTD, Osiyo taraqqiyot banki, YTTB va/yoki boshqa shu kabi xalqaro tashkilotlar bilan hamkorlik qilish tajribasi.

3.2. Strategik rejalashtirish bo‘yicha ekspert

• Fan, ta’lim, innovatsiyalar, strategik rejalashtirish, davlat boshqaruvi va/yoki turdosh sohalarda kamida 7 yillik kasbiy tajriba;

• Milliy va/yoki tarmoq darajasida strategiyalarni ishlab chiqqanligi bo‘yicha tasdiqlangan tajriba;

• strategiyalarning amalga oshirilishini monitoring qilish, jumladan, KPI’larni ishlab chiqish va qo‘llash, rivojlanish jarayonini baholash hamda tuzatish choralarini tayyorlash bo‘yicha amaliy tajriba;

• mamlakat darajasida fan, texnologiyalar va innovatsiyalar tizimi auditini va/yoki baholashini o‘tkazish tajribasi (STI audit, national innovation system assessment);

• milliy va/yoki tarmoq darajasida fan va innovatsiyalarning holati to‘g‘risida tahliliy ma’ruzalar tayyorlash tajribasi;

• Jahon banki, BMTTD, Osiyo taraqqiyot banki, YTTB va/yoki boshqa shu kabi tashkilotlarni o‘z ichiga olgan xalqaro tashkilotlar bilan ishlash tajribasi.

3.3. Fan, texnologiyalar va innovatsiyalar bo‘yicha ekspert

• fan, texnologiyalar, innovatsiyalar va strategik rivojlanish sohasida kamida 10 yillik kasbiy ish tajribasi;

• davlat organlari, akademik muassasalar, ilmiy jamg‘armalar, ilmiy-tadqiqot va tajriba-konstruktorlik ishlanmalarini tijoratlashtirish markazlari yoki ilm-fan va innovatsiya siyosatini rivojlantirish bilan bog‘liq tashkilotlarda ishlaganlik tajribasi;

• milliy, tarmoq yoki institutsional darajada fan, texnologiyalar va innovatsiyalarni rivojlantirish strategiyalari va dasturlarini ishlab chiqishda va/yoki amalga oshirishda ishtirok etish tajribasi;

• ilmiy-texnik salohiyatni tahlil qilish, innovatsion ekotizimlarni baholash hamda tadqiqot va ishlanmalar natijalarini tijoratlashtirish tajribasi;

• Jahon banki, BMTTD, Osiyo taraqqiyot banki, YTTB va/yoki boshqa shu kabi tashkilotlarni o‘z ichiga olgan xalqaro tashkilotlar bilan ishlash tajribasi.

3.4. Monitoring, baholash va tahlil bo‘yicha ekspert

• tahliliy ishlar, loyiha va/yoki dasturlarni monitoring qilish va baholash sohasida kamida 5 yillik kasbiy ish tajribasi;

• ma’lumotlar, statistika va xalqaro reytinglar bilan ishlash bo‘yicha tasdiqlangan tajribaga egalik;

• monitoring, natijalarni baholash va samaradorlikning asosiy ko‘rsatkichlari tizimlarini ishlab chiqish va/yoki qo‘llash tajribasiga egalik;

• miqdoriy va sifatli ma’lumotlar asosida tahliliy materiallar va baholash hisobotlarini tayyorlash tajribasiga egalik;

• strategik va/yoki ilmiy-innovatsion loyihalarda ishtirok etganlik.

Barcha to‘rtta lavozim uchun umumiy talablar:

• yuqori darajadagi tahliliy, kommunikatsiya va taqdimot ko‘nikmalariga egalik;

• davlat va/yoki xalqaro tashkilotlar bilan ishlash tajribasiga egalik;

• loyihaning tegishli qismini professional darajada bajarish, jumladan, ishchi uchrashuvlar va konsaltinglar o‘tkazish, hujjatlarni tahlil qilish hamda tahliliy va strategik materiallarni tayyorlash uchun yetarli darajada rus tilini bilish;

• Fanlar akademiyasi rahbariyati va ishchi guruhi bilan bevosita hamkorlik qilishga, xususan, Toshkent shahrida yuzma-yuz ishchi uchrashuvlar va konsaltinglashuvlar o‘tkazishga tayyorlik.

• Transformatsiyadagi ilmiy va innovatsion tizimlarga ega mamlakatlarda ishlash tajribasi, shuningdek, fanlar akademiyalari rivojlanishining o‘ziga xos jihatlarini bilish afzallik hisoblanadi.

4. Kutilayotgan natijalar

Har bir konsultant o‘z mas’uliyat doirasida loyiha natijalarining umumiy paketini, jumladan, quyidagilarni tayyorlashda ishtirok etadi:

• Fanlar akademiyasi diagnostikasi natijalari bo‘yicha tahliliy hisobot;

• O‘zbekiston Respublikasi Fanlar akademiyasini 2035-yilgacha rivojlantirish strategiyasi loyihasi;

• Strategiyani 2027–2035-yillarda amalga oshirish rejasi;

• samaradorlikning asosiy ko‘rsatkichlari (KPI) va monitoring indikatorlari tizimini;

• Akademiyaning taklif va mulohazalari inobatga olingan holdagi Strategiyaning yakuniy tahririni;

• Fanlar akademiyasi rahbariyati va kollegial organlari uchun taqdimot materiallarini.

5. Shartnomaning amal qilish muddati

Xizmat ko‘rsatish muddati: 2026-yil sentyabrdan 2026-yil 15-dekabrgacha. Yakuniy hujjatlar to‘plami 2026-yil 15-dekabrdan kechikmay taqdim etilishi lozim.

6. Ish joyi va formati

Hamkorlik uchun asosiy joy — Toshkent shahri, O‘zbekiston Respublikasi. Ish masofaviy hamkorlik hamda Fanlar akademiyasi rahbariyati, tarkibiy bo‘linmalari va idoraviy mansub tashkilotlari bilan yuzma-yuz ishchi uchrashuvlarini birgalikda olib borishni nazarda tutadi.

7. Nomzod nimalarni taqdim etishi kerak?

• ariza topshirilayotgan lavozim va barcha amaldagi soliq va yig‘imlar hisobga olingan holda o‘zbek so‘mida so‘ralayotgan gonorar miqdori majburiy ko‘rsatilgan, to‘ldirilgan anketani;

• malaka, kasbiy tajriba va asosiy loyihalar ko‘rsatilgan CV / kasbiy rezyumeni;

• buyurtmachi, mamlakat, amalga oshirish davri va bajarilgan ishlarning qisqacha tavsifi ko‘rsatilgan holda so‘nggi yillarda bajarilgan shunga o‘xshash loyihalar ro‘yxatini;

• tegishli lavozim bo‘yicha vazifalarni bajarishga doir taklif etilayotgan yondashuv va metodologiyaning qisqacha tavsifini;

• 2026-yil 15-dekabrgacha loyihada ishtirok etishning dastlabki reja-jadvalini;

• mavjud bo‘lsa, aloqa ma’lumotlari va dolzarb tavsiyanomalar/ma’lumotnomalarni.

Zaruriyat tug‘ilganda, Fanlar akademiyasi nomzodning malakasi va tajribasini tasdiqlovchi qo‘shimcha hujjatlarni so‘rab olishga haqli.

8. Arizalarni topshirish muddati

Arizalar 2026-yil 7-sentabr kuni soat 17:00 ga qadar (Toshkent vaqti bilan) qabul qilinadi. Belgilangan muddatdan keyin kelib tushgan arizalar ko‘rib chiqilmaydi.

9. Topshirish tartibi

Ariza va unga ilova qilinadigan materiallarni elektron shaklda quyidagi manzilga yuborish kerak:

Email: a.bakhodirov@academy.uz

Mas’ul shaxs: A. Bahodirov

Telefon: +998 97 442 77 84

Xatning mavzu qismida: “Application – International Consultant for Development Strategy of the Academy of Sciences of Uzbekistan – [Position]” deb ko‘rsatilishi lozim.

Barcha materiallar rus yoki ingliz tilida taqdim etilishi kerak.

10. Qo‘shimcha ma’lumot

Arizalarni baholashda nomzodning xalqaro tajribasi sifati va dolzarbligiga, malakasining muayyan lavozim talablariga mosligiga, shunga o‘xshash loyihalarni amalga oshirish tajribasiga, taklif etilayotgan metodologiyaning chuqurligiga va taklif qilinayotgan yechimlarning amaliy ijrosini ta’minlash qobiliyatiga alohida e’tibor qaratiladi.

O‘zbekiston Respublikasi Fanlar akademiyasi nomzodlardan qo‘shimcha ma’lumotlar so‘rab olish hamda dastlabki saralashdan o‘tgan nomzodlar bilan onlayn yoki yuzma-yuz suhbat o‘tkazish huquqini o‘zida saqlab qoladi.

O‘zbekiston Respublikasi Fanlar akademiyasining Strategik rejalashtirish va xalqaro grantlarni jalb etish bo‘limi.