O'zbekiston Respublikasi Fanlar akademiyasi

O‘zbekiston Respublikasi Prezidentining 2022-yil 7-martdagi “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmoni asosida ta’sis etilgan “Ibratli oila” ko‘krak nishoni jamiyatda oilaviy qadriyatlarni mustahkamlash, sog‘lom ma’naviy muhitni qaror toptirish, farzand tarbiyasida ibrat ko‘rsatish hamda xotin-qizlarning davlat va jamiyat hayotidagi faolligini qo‘llab-quvvatlash borasida fidokorona xizmat qilayotgan insonlarga beriladi.

Ushbu ko‘krak nishoni bilan Fanlar akademiyasi Ijtimoiy-gumanitar fanlari bo‘limi rahbari, professor Nodira Mustafayeva taqdirlandi.
Professor Nodira Mustafayeva ko‘p yillik samarali ilmiy-pedagogik faoliyati, ijtimoiy-gumanitar fanlar rivojiga qo‘shayotgan munosib hissasi, yosh avlodni vatanparvarlik, ma’naviyat va milliy qadriyatlar ruhida tarbiyalash yo‘lidagi xizmatlari bilan ilmiy jamoatchilik orasida katta hurmat-e’tiborga sazovor bo‘lib kelmoqda.

Nodira Mustafayevani samimiy muborakbod etamiz.  Ularga mustahkam sog‘lik, uzoq umr, oilaviy baxt-saodat, ilmiy va ijodiy faoliyatida yangi yutuqlar, ulkan muvaffaqiyatlar tilaymiz. Kelgusida ham yurtimiz taraqqiyoti, ilm-fan ravnaqi va barkamol avlod tarbiyasi yo‘lidagi ezgu faoliyatlari bardavom bo‘lsin!