Joriy yilning 15-aprel kuni Oʻzbekiston Respublikasi Investitsiyalar, sanoat va savdo vaziri Laziz Kudratov Yevropa tiklanish va taraqqiyot bankining Markaziy Osiyo boʻyicha boshqaruvchi direktori Jujanna Hargitay bilan muzokaralar oʻtkazdi.
Suhbatda YETTB ishtirokidagi joriy investitsiya loyihalarini amalga oshirish jarayoni va hamkorlikni yanada rivojlantirish istiqbollari koʻrib chiqildi.
Joriy yilning may oyi boshida YETTB bilan birgalikda Toshkent xalqaro investitsiya forumi doirasidagi xorijiy investorlar kengashining navbatdagi yig‘ilishini yuqori darajada o‘tkazish bo‘yicha tashkiliy masalalar yuzasidan kelishib olindi.
YeTTB portfeliga suv taʼminoti va oqava suvlarni tozalash, energetika, markazlashtirilgan issiqlik taʼminoti, transport, kichik va oʻrta biznesni qoʻllab-quvvatlash sohalarida umumiy qiymati 391,3 million yevrolik 16 ta yakunlangan loyiha, shuningdek, umumiy qiymati 3 milliard yevro boʻlgan 15 ta hozirgi kunlarda amalga oshirilayotgan loyiha kiradi.
Shu bilan birga, suv taʼminoti, taʼlim, energetika, yoʻllarni rekonstruksiya qilish, transport va qattiq maishiy chiqindilarni qayta ishlash sohalarida 815 million yevrolik 8 ta loyiha ishlab chiqilmoqda.