Oʻzbekistonlik talabalarga Xitoyning Shinjon-Uygʻur avtonom tumanidagi universitetlarida tahsil olishlari uchun stipendiyalar taqdim etiladi

Tomonlar oliy taʼlim muassasalari va ilmiy muassasalar oʻrtasida toʻgʻridan toʻgʻri hamkorlik aloqalarini oʻrnatish, taʼlim, ilmiy tadqiqotlar, texnologiya va menejment sohasida tajriba almashishni qoʻllab-quvvatlash, oʻzaro tashriflar hamda oʻqituvchilar va ilmiy xodimlar almashinuvini amalga oshirishga kelishdilar. Shuningdek, qoʻshma tadqiqot guruhlarini yaratish, hamkorlikda ilmiy tadqiqotlarni olib borish ham kelishuvning uzviy qismi boʻldi. 

Shartnomaga koʻra, Xitoy tomoni har yili noyabr oyining oxirigacha Oʻzbekiston Respublikasi fuqarolari Xitoyda tahsil olishi mumkin boʻlgan oliy oʻquv yurtlari roʻyxatini, shuningdek, stipendiya dasturlari shartlari va talablari toʻgʻrisidagi maʼlumotlarni taqdim etadi. Oʻzbekiston Respublikasi Oliy taʼlim, fan va innovatsiyalar vazirligi esa Xitoy Xalq Respublikasining Shinjon-Uygʻur avtonom tumanidagi universitetlarda oʻqish uchun tavsiya etilgan talabalar roʻyxatini taqdim etadi. 

Chet el fuqarolari orasidan stipendiya egalari uchun oʻqish muddati milliy taʼlim tizimi talablariga muvofiq qabul qiluvchi tomon tomonidan belgilanadi. Xitoyda oʻqish uchun nomzodlar maʼlum darajadagi xitoy tilini bilishi talab etiladi. Zarur hollarda stipendiyaga tavsiya etilgan talabalar uchun til kurslarini tashkil qilinishi mumkinligi ham inobatga olingan. 

Birlamchi kelishuvga koʻra, stipendiyalar oʻqish, toʻlovlar va turar joy, sugʻurta mukofotlari (shu jumladan, tibbiy sugʻurta) va yashash xarajatlarining bir qismini qoplashi nazarda tutilmoqda.