FAO bilan hamkorlikdagi ish rejasi muhokama qilindi

Bu yerda iqtisodiyotning turli yo‘nalishlari qatorida qishloq xo‘jaligi yo‘nalishida alohida chiqishlar, taqdimotlar bo‘lgani bejiz emas. Ko‘p mamlakatlarning iqtisodiy yuksalishida ayni mazkur soha asosiy o‘rinni tutishi rost. Shunday ekan, forum ishtirokchilari vaqt va imkoniyatdan foydalanib Samarqand zaminidagi hamkorlik muloqotlarini boshlab yuborishdi. Jumladan, Qishloq xo‘jaligi vazir Ibrohim Abdurahmonov BMTning Oziq-ovqat va qishloq xo‘jaligi tashkiloti (FAO)ning Markaziy Osiyodagi rahbari V.Gutsu  bilan muzokara o‘tkazdi.

Unda O‘zbekiston va FAO o‘rtasidagi hamkorlikning hozirgi holati muhokama qilindi. So‘nggi yillardagi siyosiy va texnik darajadagi hamkorlik masalalariga to‘xtab o‘tildi.

Sir emaski, xalqimizning turmush farovonligini yuksaltirish, oziq-ovqat xavfsizligini va aholi bandligini taʼminlash, barqaror rivojlanishga erishishda qishloq xo‘jaligining o‘rni juda katta. Shu bois, mamlakatimizda qishloq xo‘jaligini isloh qilish va bozor tamoyillarini joriy etishga alohida eʼtibor qaratilib, sohaga doir ko‘plab hujjatlar qabul qilinmoqda.

V.Gustu O‘zbekistonda amalga oshirilayotgan milliy va mintaqaviy loyihalar soni oshib borayotganini mamnuniyat bilan qayd etar ekan, hamkorlikni muvofiqlashtirish samaradorligini oshirish maqsadida 2014 yilda Toshkentda ochilgan filialga O‘zbekistondan doimiy vakil joriy etish taklifini eslatdi.

Shuningdek, uchrashuv davomida FAO sub-mintaqaviy koordinatori Markaziy Osiyo mamlakatlari vazirlarining navbatdagi uchrashuvini onlayn formatda o‘tkazishga tayyorgarlik ko‘rayotganini maʼlum qildi.

Bundan tashqari, sentabr oyida Samarqandda bo‘lib o‘tgan Oziq-ovqat xavfsizligi bo‘yicha xalqaro konferensiyada muhokama qilingan tashabbuslarni amalga oshirish bo‘yicha keyingi amaliy qadamlarni belgilab oldilar.

Xususan, tomonlar qishloq xo‘jaligi tovarlari savdosining samarali tizimini yo‘lga qo‘yish bo‘yicha tajriba almashish maqsadida O‘zbekistonda dengiz chegarasi bo‘lmagan mamlakatlar o‘rtasida konferensiya o‘tkazish tashabbusini ijroga qaratishni belgilab oldilar.

Shuningdek, Afg‘onistonda qishloq xo‘jaligini ravnaq toptirish hamda rivojlantirish masalalari bo‘yicha o‘zaro hamkorlik qilish masalalarini ham muhokama qildilar.