Dastlab vazir Q.Sharipov oliy ta’lim, ilm-fan va innovatsiyalar sohasida olib borilayotgan islohotlar, Italiya bilan mavjud hamkorlik aloqalari haqida batafsil ma’lumot berdi. Shuningdek, Italiya bilan sohada ikki tomonlama hamkorlik aloqalarini kengaytirish, ko‘proq texnika va muhandislik fanlarni rivojlantirishga hamda ushbu yo‘nalishlarda kadrlar tayyorlash bo‘yicha hamkorlikka yanada ko‘proq e’tibor qaratilayotgani ta’kidlandi.

O‘z navbatida, elchi Piergabriele Papadiya de Bottini O‘zbekiston va Italiya o‘rtasidagi aloqalar yaqin hamda faol ekanligi, ikki mamlakat uchun hamkorlikning asosiy va muhim yo‘nalishi ta’lim, ilm-fan sohasi hisoblanishini qayd etdi.  

Muloqotda Italiyalik professor-o‘qituvchilarni nafaqat italyan tilini o‘qitish, balki turli sohalar va ta’lim yo‘nalishlari bo‘yicha ma’ruza o‘qish, mahorat darslarini o‘tkazish, tajriba almashish maqsadida respublika oliygohlariga taklif qilish, shuningdek, Toshkent shahridagi Turin politexnika universitetida tahsil olayotgan iqtidorli talabalarni Italiya zavodlariga amaliyot o‘tash uchun yuborish takliflari bildirildi.

Muzokara davomida respublika oliygohlarining Yevropa Ittifoqining Erazmus+, Gorizont va boshqa dasturlarida ishtirok etishi
hamda hamkorlikda ta’lim va ilm-fan sohasida loyihalarni amalga oshirish alohida ahamiyat kasb etishi aytib o‘tildi. 

Shuningdek, Italiyada ta’lim olish imkoniyatlari, madaniyati bilan yaqindan tanishish maqsadida tomonlar o‘rtasida O‘zbekistonda yoshlar va talabalar uchun “Italiya ta’lim kunlari”, “Italiya ochiq eshik kunlari” kabi tadbirlarni hamkorlikda o‘tkazish borasida kelishuvlarga erishildi.