Unda O‘zbekiston Respublikasi Suv xo‘jaligi vaziri Sh.Xamrayev, Turkmaniston Suv xo‘jaligi davlat qo‘mitasi raisi D.Gendjiev, Qozog‘iston Respublikasi suv resurslari va irrigatsiya vaziri N.Nurjigitov, Tojikiston Respublikasi energetika va suv resurslari vazirining birinchi o‘rinbosari J.Shoimzoda ishtirok etdi va so‘zga chiqdi.

Shuningdek, yig‘ilishda komissiya ijro etuvchi organlari hisoblangan “Amudaryo” va “Sirdaryo” havzalari suv xo‘jaligi birlashmalari, Ilmiy-axborot markazi va kotibiyati rahbarlari, Orolni qutqarish xalqaro jamg‘armasi ijroiya qo‘mitasi raisi va boshqa ekspertlar ishtirok etdi.

O‘zbekiston Respublikasi Suv xo‘jaligi vaziri Sh. Xamrayev o‘z ma’ruzasida O‘zbekiston Prezidenti Sh.Mirziyoyev tomonidan suv xo‘jaligi sohasini rivojlantirishga qaratilayotgan e’tibor, Davlatimiz rahbarining suv muammosini hal qilishda mintaqa mamlakatlari va xalqlari manfaatlarini teng hisobga olish bo‘yicha ilgari surgan tashabbuslari, ularning samarasi haqida so‘z yuritdi.

Markaziy Osiyo davlatlari rahbarlarining oqilona olib borayotgan siyosati natijasida suv xo‘jaligi sohasida aloqalarning mutlaqo yangi muhiti shakllangani, bu esa muloqot, samarali murosa va o‘zaro manfaatlarni hisobga olishga asoslangan konstruktiv munosabatlarni o‘rnatish imkonini berayotganligi, do‘stona va ishonchli munosabatlar transchegaraviy suv resurslaridan adolatli va oqilona foydalanish uchun mustahkam zamin yaratayotganligi e’tirof etildi.

Yig‘ilishda mintaqada suv resurslaridan samarali foydalanish, Orolni qutqarish xalqaro jamg‘armasi ta’sischi Davlat rahbarlarining sammitlarida belgilangan vazifalar ijrosi haqidagi hisobotlar eshitildi hamda kun tartibidagi masalalar muhokama qilindi. Jumladan, “Amudaryo” va “Sirdaryo” havzalarida 2024‑2025-yil vegetatsiya mavsumlari oralig‘ida davlatlarning suv olish limitlari tasdiqlandi hamda “Amudaryo” va “Sirdaryo” havzalari suv xo‘jaligi birlashmalarining suv omborlari kaskadlarining prognoz ishlash rejimi bo‘yicha takliflari ma’lumot uchun qabul qilindi.

Orolni qutqarish xalqaro jamg‘armasi Ijroiya qo‘mitasi raisining hisoboti eshitildi, shu bilan birga, 2024-yil 12‑13-dekabrda jamg‘armaning tashkiliy tuzilmasi va huquqiy bazasini takomillashtirish hamda faoliyatini kuchaytirish bo‘yicha ishchi guruhining 13-yig‘ilishini o‘tkazish taklifi berildi.

Davlatlararo suv xo‘jaligini muvofiqlashtirish komissiyasining navbatdagi 88-yig‘ilishini Tojikiston Respublikasi Dushanbe shahrida o‘tkazishga kelishildi.

Yig‘ilish yakunida tegishli bayonnoma imzolandi.