“Bir bo‘lsak – yagona xalqmiz, birlashsak – Vatanmiz!”
2024-08-30 13:50:00 / Yangiliklar
Zero, aynan milliy mustaqillik el-yurtimiz uchun jahon hamjamiyatidan munosib o‘rin egallab, huquqiy demokratik davlat va erkin fuqarolik jamiyatini qurish, shu jumladan, hayotning turli soha va tarmoqlarida keng ko‘lamli islohotlarni amalga oshirish uchun mustahkam zamin yaratib, erishayotgan barcha yutuq va marralarimizning asosiy manbai bo‘lib kelmoqda.
O‘zbekiston Respublikasi Harbiy aviatsiya instituti madaniyat markazida bayram munosabati bilan “Mustaqillik bayraming abadiy bo‘lsin, jonajon O‘zbekistonim” shiori ostida tantanali tadbir va bayram dasturi o‘tkazildi.
Dastavval, mudofaa vazirining hamda institut boshlig‘ining shaxsiy tarkibni rag‘batlantirish to‘g‘risidagi buyruqlari bilan taqdirlangan harbiy xizmatchilarga ko‘krak nishonlari, qimmatbaho sovg‘a va esdalik nishonlari tantanali ravishda topshirildi. Bayram munosabati bilan harbiy-ilmiy sohaga o‘zining munosib hissasini qo‘shib kelayotgan, milliy armiyamizning ma’naviy-ma’rifiy saviyasini oshirishda, jangovarlik sifatlarini mustahkamlashda jonbozlik ko‘rsatayotgan harbiy xizmatchilar va professor-o‘qituvchilar tomonidan barchaga samimiy tilaklar bildirildi.
Badiiy ijodiy guruh tomonidan tayyorlangan konsert dasturi, mustaqillik g‘oyasi bilan millatni sug‘organ jadid ma’rifatparvarlarimizning qarashlarini hamda faoliyatini o‘zida aks ettirgan sahna ko‘rinishlari tomoshabinlarga manzur bo‘ldi. Bayramda bayramona shukuh ufurib turdi.