Tashrif davomida Xitoy Xalq Respublikasi Atom energetikasi agentligi hamda Xitoy Energetika boshqarmasi rahbariyati bilan ushrashuvlar oʻtkazildi. Muloqotlar davomida ikki tomonlama hamkorlik aloqalari, jumladan  2024-yilning yanvar oyida davlatimiz rahbarining Xitoy Xalq Respublikasiga amalga oshirgan tashriflari davomida Oʻzbekiston Respublikasi Togʻ-kon sanoati va geologiya vazirligi hamda Xitoy Xalq Respublikasining uran yoʻnalishi boʻyicha yirik korporatsiyalari oʻrtasida imzolangan kelishuvlar muhokama qilindi.

Tashrif davomida “Navoiyuran” DK mutaxassislari China National Nuclear Corporation (CNNC) korporatsiyasi tarkibidagi “BRICEM CNUC” (geologiya) va “BRIUG CNUC” (texnologiya) ilmiy markazlariga tashrif buyurib, ilmiy markazlar tomonidan amalga oshirilayotgan loyihalar hamda ushbu markazlarda tatbiq etilgan texnologiyalar bilan tanishishdi.

Xorijiy safar davomida CNNC korporatsiyasi tarkibidagi uran mahsulotini konversiya qilish va boyitish, atom elektr stansiyalari uchun yoqilgʻi ishlab chiqarish majmualari faoliyati hamda korporatsiyada qoʻllanilayotgan yangi innovatsion texnologiyalar bilan ham tanishildi. Shuningdek korporatsiya rahbariyati bilan ushbu texnologiyalarni respublikamizda joriy qilish orqali qoʻshimcha qiymatli mahsulot yaratish borasida muzokaralar olib borildi. 

Xizmat safari yakunida Oʻzbekiston Respublikasi Togʻ-kon sanoati va geologiya vazirligi, “Navoiyuran” DK hamda CNNC korporatsiyasi tarkibiga kiruvchi CNUC kompaniyasi bilan respublikamizda istiqbolli hududlarda geologiya-qidiruv ishlarini olib borish boʻyicha uch tomonlama kelishuv hamda uran va boshqa foydali elementlarni qidirish hamda ajratib olish boʻyicha Innovatsion ilmiy-texnologik markazni yaratish boʻyicha Memorandum imzolandi.

Imzolangan hujjatlar ijrosini taʼminlash maqsadida joriy yilning sentabr oyida CNNC korporatsiyasi vakillarining Oʻzbekistonga tashrif buyurishi hamda ishlarni boshlashga kelishib olindi.