Joriy yil 7-fevral kuni Agentlik huzuridagi Ilmiy-ekspert kengashining 2025-yildagi navbatdagi yig‘ilishi Toshkentdagi Madaniy meros ilmiy-tadqiqot institutida o‘tkazildi. Ushbu majlisda Kengash a’zolari tomonidan ijtimoiy tarmoqlarda muhokamalarga sabab boʻlgan dolzarb loyihalar ko‘rib chiqildi.
 
Yig‘ilish kun tartibidan Toshkent shahrining Chilonzor tumani, Beshyog‘och ko‘chasida joylashgan 4 qavatli turar joy binolarini Moddiy madaniy merosning ko‘chmas mulk obyektlari milliy ro‘yxatiga kiritish bo‘yicha taklif va Shayxontohur tumani, Nurafshon ko‘chasida joylashgan “Chilonzor Oqtepasi” arxeologiya yodgorligining tevarak-atrofini obodonlashtirish hamda yodgorlik hududini devor bilan o‘rash bo‘yicha tayyorlangan loyihalar o‘rin olgan. Ilmiy-ekspert kengashi a’zolari tomonidan muhokama qilinadigan loyihalar haqidagi ma’lumotlar bilan Madaniy meros agentligining rasmiy sayti orqali tanishib chiqishingiz mumkin.

Ma’lumot uchun, 2024-yilning 20-may kuni Vazirlar Mahkamasining “O‘zbekiston Respublikasi Madaniy meros agentligining Ilmiy-ekspert kengashi faoliyatini yanada takomillashtirish chora-tadbirlari to‘g‘risida”gi qarori qabul qilingan. Qarorga muvofiq Kengashga moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari, ularda rejalashtirilgan asrashga doir ishlarni obyektning tarixiy va madaniy ahamiyati hamda noyobligiga putur yetkazmagan holda texnologiya va materiallarning qo‘llanilishi bo‘yicha tegishli xulosa berish kabi qator vazifalar yuklatilgan.