O‘zbekiston Respublikasi Madaniy meros agentligi

So‘nggi kunlarda ijtimoiy tarmoqlarda Shota Rustaveli ko‘chasidagi 22-son turar-joy binosining buzilishi mo‘ljallanayotgani haqidagi xabar jadallik bilan tarqalmoqda. Unga ko‘ra, go‘yo uy foydalanish uchun yaroqsiz holatga keltirish orqali fevral oyida buzib tashlashga hozirlanmoqda. 

Madaniy meros agentligi vaziyatni joyiga chiqqan holda sinchkovlik bilan o‘rganib chiqib, quyidigilarni ma’lum qiladi:

 

1. Inshoot maqomi 

O‘zbekiston Respublikasi Vazirlar Mahkamasining 846-sonli qaroriga muvofiq mazkur turar-joy binosi Moddiy madaniy merosning ko‘chmas mulk obyektlari Milliy ro‘yxatidan o‘rin olmagan. Biroq hozirda uni mazkur reyestrga kiritish bo‘yicha ishlar olib borilmoqda.

 

2. Rejalashtirilayotgan ishlar 

O‘rganishlar yakuniga yetgach, mazkur masala Madaniy meros agentligi huzuridagi Ilmiy-ekspert kengashi e’tiboriga ko‘rib chiqish uchun havola etiladi.

 

3. Buzish to‘g‘risidagi qarorning mavjud emasligi

Toshkent shahar hokimligining ma’lumotlariga ko‘ra, ayni paytda 22-sonli uyni buzish to‘g‘risida rasmiy qaror qabul qilinmagan.

Agentlik shuni eslatib o‘tadiki, tarixiy va madaniy qiymatga ega obyektlarga nisbatan har qanday xatti-harakatlar ixtisoslashgan idoralar tomonidan puxta tahlil qilinib, kelishilganidan so‘nggina amalga oshiriladi.

Biz jamoatchilik va ommaviy axborot vositalarini aholi o‘rtasida xavotir uyg‘otadigan tasdiqlanmagan ma’lumotlarni tarqatishdan tiyilishga chaqirib qolamiz. Ushbu obyekt maqomi bilan bog‘liq barcha o‘zgarishlar rasman e’lon qilinadi.

Agar sizda ushbu uy bilan bog‘liq qo‘shimcha ma’lumot yoki savollar mavjud bo‘lsa, Madaniy meros agentligiga murojaat qilishingiz mumkin.

#MerosniSaqlaymiz #Toshkent #MadaniyMeros