Joriy yilning oktabr oyida Madaniy meros agentligi bilan hamkorlikda “Wiki yodgorliklarni sevadi” xalqaro fotosuratlar tanlovi bo‘lib o‘tgan edi. Ishtirokchilar yurtimizdagi madaniy meros obyektlarini turli rakurslardan suratga olgan holda musobaqada ishtirok etishdi. Tanlovning 2-bosqichida 174 ta surat xalqaro va mahalliy hakamlar hay'ati tomonidan yurtimizning turli hududlaridagi obidalarni aks ettiruvchi bir-biridan ajoyib suratlar orasidan tanlab olindi.

 

2024-yilning 24-dekabr kuni tanlov g‘oliblari diplom va esdalik sovg‘alari bilan taqdirlandi. Xalqaro tanlovda Shohruh Abdivahobov, Umid Bakoyev, Ivan Beshev, Yekaterina Borisova, Sergey Krilov, Xumoyun Mehridinov, Marat Nadjibayev, Arina Pan va Dina Xalikovalar g‘olib deb topildilar. Ular yurtimizdagi madaniy meros obyektlari hamda muzeylarga tashrif buyurish uchun bir yillik bepul vaucher va sertifikatga ham ega bo‘lishdi. 

 

Ma’lumot uchun, 2010-yildan beri 50 dan ortiq mamlakatlar ishtirok etib kelayotgan xalqaro tanlovning maqsadi tarixiy binolar va diqqatga sazovor maskanlarni tarix zarvaraqlariga o‘ziga xos va ko‘rkam ravishda muhrlab, ularni mahalliy va xalqaro jamoatchilik orasida targ‘ib etishga qaratilgan. Shuningdek, tanlovdan ko‘zlangan maqsad me’moriy yodgorliklarni asrab-avaylash, madaniy meros obyektlariga keng jamoatchilik e’tiborini oshirish hamda sayyohlik rivojiga hissa qo‘shishdan iborat.

 

G‘oliblikka munosib ko‘rilgan fotosuratlarni bu yerda tomosha qilishingiz mumkin.