Xizmat safar davomida Bahodir Ahmedov Qoraqalpog‘iston Respublikasi Madaniyat vaziri Begis Temirbayev bilan Ellikqal’a tumanida faoliyat olib borayotgan O‘zbek milliy maqom san’ati markazi Qoraqalpog‘iston Respublikasi hududiy bo‘linmasida bo‘lib, bu yerda tashkiliy masalalarga bog‘liq yig‘ilish o‘tkazdi.

 

Majlisda bugungi kunga qadar Ellikqal’a tumani 23-son bolalar musiqa va san’at maktabi direktori bo‘lib faoliyat olib borayotgan Bekchanov Umid O‘zbek milliy maqom san’ati markazi Qoraqalpog‘iston Respublikasi hududiy bo‘linmasi direktori lavozimiga tayinlanib, jamoaga tanishtirildi.

 

Shuningdek, maqom jamoasining hisobot konsertini tomosha qildi va maqom ansambli faoliyatini takomillashtirish, ansamblining badiiy saviyasini oshirish, kelgusi yili xorijiy ijodiy safarlarni amalga oshirish yuzasidan mas’ullarga topshiriqlar berildi.

 

Shu kunning o‘zida Bahodir Ahmedov Beruniy va Taxtako‘pir tumanlari Madaniyat bo‘limlari va madaniyat markazlari ijodiy xodimlari bilan uchrashdi.

 

Uchrashuvda madaniyat markazlari faoliyatini takomillashtirish, ijodiy va havaskorlik jamoalarning konsert dasturlarini tashkil etish, markaz xodimlarini qo‘llab-quvvatlash yuzasidan taklif va topshiriqlar berildi.

 

Safar davomida Bahodir Ahmedov O‘zbekiston davlat filarmoniyasi Qoraqalpog‘iston Respublikasi bo‘linmasining hisobot konsertini va o‘tgan yili Qoraqalpog‘iston Respublikasi Madaniyat vazirligi tomonidan tashkil etilgan "Yosh" estrada loyihasi ishtirokchilari bilan uchrashib, ular ijrosidagi konsert dasturini ham tomosha qildi.

 

Konsertdan so‘ng qoraqalpoq filarmoniyasi jamoasiga ijodiy faoliyatiga yuqori baho berib, filarmoniya ijodiy jamoasi va "Yosh" estrada loyihasi ishtirokchilarini qo‘llab-quvvatlash bo‘yicha mas’ullarga topshiriqlar berdi. Jumladan, "Yosh" loyihasi ishtirokchilari "O‘zbekkonsert" davlat muassasasi tomonidan 50 million so‘m miqdorida rag‘batlantirish va bir qator imtiyozlar yaratish bo‘yicha topshiriqlar berildi.