O‘zbekiston va Qirg‘iziston teatrlari o‘rtasida hamkorlik memorandumlari imzolandi
2024-12-14 17:00:00 / Yangiliklar
Qirg‘iziston va O‘zbekiston madaniyatlari o‘zaro mushtaraklik va hamkorlik tarixiga ega. Ikki davlat madaniyat sohasida bir qator qo‘shma loyihalarni amalga oshirmoqda.
Buni misol sifatida kecha, 13-dekabr kuni Qirg‘iziston Respublikasi Prezidenti Sadir Japarov O‘zbekiston madaniyat vaziri Ozodbek Nazarbekovni “Qirg‘iziston Respublikasi xalq artisti” faxriy unvoni bilan taqdirlaganida ko‘rish ham mumkin.
Kuni kecha ikki davlat teatrlari o‘rtasidagi hamkorlik yuzasidan O‘zbekiston davlat drama teatr sahnasida buyuk adib Chingiz Aytmatov tavalludining 95-yilligi munosabati bilan Qirg‘iziston Respublikasining To‘qto‘g‘ul Aziboyev nomidagi Oloy musiqali drama teatri jamoasi tomonidan sahnalashtirilgan "Moviy qirg‘og‘im” spektaklini o‘zbek tomoshabinlariga namoyish etdilar.
O‘zbekiston Respublikasi Madaniyat vazirligi Konsert-tomosha faoliyatini rivojlantirish boshqarmasi boshlig‘i Bahrom Usmonov hamda O‘zbekiston davlat drama teatri direktori Otabek Jo‘rayev Qirg‘iziston teatr jamoasiga esdalik sovg‘alar topshirdilar. Ushbu sovg‘alar ikki davlat san’at va madaniyat sohasidagi mustahkam aloqalarining yorqin ramzi sifatida qabul qilindi.
Spektakl O‘zbekiston tomoshabinlariga katta ta’sir ko‘rsatib, ular tomonidan iliq kutib olindi.Bu tadbir O‘zbekiston va Qirg‘iziston teatr jamoalari o‘rtasidagi ijodiy hamkorlikning yorqin namunasi bo‘ldi.
Tadbirda O‘zbekiston va Qirg‘iziston o‘rtasidagi do‘stlik va ijodiy aloqalarni mustahkamlash maqsadida O‘zbekiston davlat drama teatri hamda To‘qto‘g‘ul Azizboyev nomidagi Oloy musiqali drama teatrlari o‘rtasida hamkorlik memorandumlari imzolandi.