#Xalqaro_hamkorlik #Ehtirom_uchrashuvi
2024-11-05 19:00:00 / Yangiliklar
O‘zbekiston madaniyat vaziri Ozodbek Nazarbekov hamda Jazoir, Misr davlatlarining mamlakatimizdagi Favqulodda va Muxtor Elchilari, Gruziyaning O‘zbekistondagi Muvaqqat ishlar vakili o‘rtasida ehtirom uchrashuvi bo‘lib o‘tdi
Bugun, 5-noyabr kuni madaniyat vaziri Ozodbek Nazarbekov hamda Jazoir, Gruziya, Misr davlatlarining mamlakatimizdagi Favqulodda va Muxtor Elchilari o‘rtasida ehtirom uchrashuvi bo‘lib o‘tdi.
Dastlab kunning birinchi qismida Jazoir Xalq Demokratik Respublikasining O‘zbekistondagi Favqulodda va Muxtor Elchisi Muhammad Irki hamda Gruziyaning Oʻzbekistondagi Muvaqqat ishlar vakili David Kotaria bilan uchrashgan vazir, kunning ikkinchi yarmida Misr Arab Respublikasining O‘zbekistondagi Favqulodda va muxtor elchisi Tamer Fatxi Abdusalom bilan uchrashib davlatlarimiz o‘rtasidagi o‘zaro hamkorlik aloqalari xususida fikr yuritildi.
Muhammad Irki bilan uchrashuv davomida 2022-yilda qabul qilingan “O‘zbekiston Respublikasi va Jazoir Xalq Demokratik Respublikasi o‘rtasida 2022-2023-yillarga mo‘ljallangan ikki tomonlama munosabatlarni rivojlantirishga qaratilgan chora-tadbirlar rejasi”ga muvofiq hamkorlik munosabatlarimiz birmuncha rivojlanganligi, Jazoir vakillari 2022-yilda mamlakatimizda o‘tkazilgan “Lazgi” xalqaro raqs san’ati festivalida, 2023-yilda o‘tkazilgan Xalqaro baxshichilik san’ati va Hunarmandchilik san’ati festivalida, 2024-yilda tashkil etilgan “Lazgi” xalqaro raqs san’ati festivali, Maqom san’ati anjumani va “Sharq taronalari” xalqaro musiqa festivallarida faol ishtirok etganliklari ta’kidlandi.
So‘ng, Gruziyaning Oʻzbekistondagi Muvaqqat ishlar vakili David Kotaria bilan uchrashuv davomida O‘zbekiston va Gruziya o‘rtasidagi madaniy hamkorlik aloqalari yil sayin rivojlanayotganligi haqida so‘z yuritildi.
Kunning ikkinchi yarmida o‘tgan navbatdagi uchrashuv Misr Arab Respublikasining O‘zbekistondagi Favqulodda va muxtor elchisi Tamer Fatxi Abdusalom bilan bo‘lib o‘tdi. Unda, O‘zbekiston Respublikasi Prezidenti Shavkat Mirziyoyevning Misrga, Misr Prezidenti Abdulfattoh as-Sisiyning O‘zbekistonga amalga oshirgan tashriflari davomida erishilgan kelishuvlar doirasida madaniyat sohasidagi hamkorlik aloqalari kengayganligi, ikki davlatda o‘tkaziladigan turli-tuman festival va tadbirlarda o‘zaro ishtirokning doimiy tus olganligi haqida fikr almashildi.
Jazoir, Misr davlatlarining mamlakatimizdagi Favqulodda va Muxtor Elchilari hamda Gruziyaning Oʻzbekistondagi Muvaqqat ishlar vakili bilan o‘tkazilgan ehtirom uchrashuvlari o‘zaro hurmat va yuqori darajada bo‘lib o‘tdi.