11-14-oktyabr kunlari “Tashkent City Park” majmuasida “Qatar madaniyati, hunarmandchiligi va milliy taomlari haftaligi” bo'lib o‘tmoqda. Haftalik doirasida Qatar madaniyatini aks ettiruvchi konsert dasturlari va ko‘rgazmalari namoyish etiladi.

So‘nggi yillarda O‘zbekiston Respublikasi bilan Qatar Amirligi o‘rtasidagi madaniy aloqalar rivojlanib bormoqda. O‘zbekistonda o‘tkazib kelinayotgan xalqaro festivallarda Qatar vakillarining ishtiroki buning yaqqol dalilidir.

Xususan, 2018-2024-yildagi Xalqaro maqom san’ati anjumani, 2019-yilda Xalqaro baxshi san’ati festivali, 2024-yilda o‘tkazilgan “Sharq taronalari” XIII  xalqaro musiqa festivalida Qatar vakillari ishtirok etdi.

Shuningdek, Qatar Davlati Amirining O‘zbekistonga tashrifi doirasida 2023-yilning 5-iyun kuni “O‘zbekiston Respublikasi Hukumati va Qatar Davlati Hukumati o‘rtasida madaniy hamkorlik to‘g‘risida memorandum” imzolandi.

2024-yilning 20-26-fevral kunlari esa Qatarning Doha shahrida “O‘zbekiston madaniyati, turizmi va hunarmandchiligi” kunlari bo'lib o'tdi. Tadbirlar doirasida O‘zbekiston madaniyat vaziri Ozodbek Nazarbekov va Qatar Davlati madaniyat vaziri Shayx Abdulrahmon bin Hamad Al-Tani o‘rtasida uchrashuv tashkil etildi.

O'zbekistonda 11-14-oktyabr kunlari tashkil etilayotgan tadbirdan ko‘zlangan asosiy maqsad: Qatar madaniyatining boy merosini tarannum etish, uning mumtoz va xalq amaliy san’ati, ijrochilik an’analari, urf-odat va marosimlarini namoyish qilish hamda Qatar bilan yo‘lga qo‘yilgan o‘zaro do‘stlik aloqalarini yanada mustahkamlashdan iborat. 

11-oktyabr kuni “Tashkent City Park” majmuasida tadbirning tantanali ochilish marosimi bo‘lib o‘tdi. Yana 4 kun davomida bayram tadbirlari davom etishi belgilangan.

Ochilish marosimida Qatarning rang-barang madaniy landshafti, jumladan, san’ati, nomoddiy madaniy merosi namoyishi, milliy musiqa asboblari, miniatyura va badiiy, dekorativ hamda amaliy san’ati yo‘nalishlarida, shuningdek, gastronomik ko‘rgazmalar tashkil etildi.

Tadbir doirasidagi maydon tomoshalari, hunarmandchilik va gastronomik ko‘rgazma tomoshasidan so‘ng, maydonda tashkil etilgan sahnada qatar san’at ustalari ishtirokida konsert dasturi namoyish etildi.

Haftalikning tantanali ochilish marosimida O‘zbekistonga tashrif buyurgan Qatar Davlati madaniyat vaziri Shayx Abdulrahmon bin Hamad Al-Tani, O‘zbekiston Respublikasi madaniyat vaziri Ozodbek Nazarbekov hamda bir qator vazirlar ishtirok etishdi.