Madaniyat vaziri Ozodbek Nazarbekovning II “Lazgi” xalqaro raqs festivali ishtirokchilariga tabrigi
2024-04-27 18:00:00 / Yangiliklar
Assalomu alaykum, hurmatli festival ishtirokchilari!
Qadrli mehmonlar!
Xonimlar va janoblar!
Avvalo, siz, azizlarni Sharq durdonasi bo‘lmish qadimiy va navqiron Xiva shahrida II “Lazgi” xalqaro raqs festivalining ochilishi bilan samimiy muborakbod etaman.
Bugungi anjumanda YUNESKO, TURKSOY kabi nufuzli xalqaro va mintaqaviy tashkilotlar vakillari, dunyodagi ko‘plab mamlakatlardan madaniyat va san’at namoyandalari, ommaviy axborot vositalari xodimlari ishtirok etayotgani, albatta, barchamizni quvontiradi.
Muhtaram do‘stlar!
O‘lkamizning uch ming yillik tarixi va madaniyatini o‘zida mujassam etgan “Lazgi”dek o‘lmas badiiy-musiqiy obida xalqimizning bezavol ruhi, noyob tafakkuri mahsuli bo‘lib, asrlar osha gumanistik ezgu g‘oyalarga xizmat qilib kelmoqda. Bu kabi bebaho san’at durdonalarini asrab-avaylash va boyitish, ulardan yosh avlodimiz va jahon madaniy jamoatchiligini keng bahramand etish bugungi kunda biz barpo etayotgan Uchinchi Renessansning ustuvor vazifasiga aylanmoqda.
So‘nggi yillarda yurtimizda madaniyat va san’at sohasi rivojiga qaratilgan muhim qonun, farmon va qarorlar qabul qilinib, ulkan ishlar amalga oshirilayotgani bu fikrni yaqqol tasdiqlaydi. Mumtoz milliy san’at namunalari tiklanib, o‘nlab yangi ta’lim va madaniyat muassasalari, muhtasham san’at saroylari, konsert zallari, teatr, muzey va kutubxonalar barpo etilmoqda. Mamlakatimizdagi 325 ta bolalar musiqa va san’at maktabida xoreografiya, 277 ta maktabda an’anaviy xonandalik, 109 ta maktabda baxshichilik asoslari o‘qitilmoqda.
Jahon musiqa olamida hayotbaxsh ohang bilan yangrayotgan “Lazgi” va baxshichilik san’ati YUNESKOning Insoniyat nomoddiy madaniy merosi reprezentativ ro‘yxatiga kiritildi. Yurtimizda maqom va baxshichilik san’atlari hamda hunarmandchilik bo‘yicha xalqaro festivallar muntazam o‘tkazib kelinmoqda.
Mamlakatimizda har bir hududga xos raqs maktablari qayta tiklanmoqda. Raqs san’atini ilmiy o‘rganish, buning uchun malakali mutaxassislar, san’atshunos olimlar tayyorlash tizimi takomillashtirilmoqda. O‘zbek raqs san’ati ustalari tomonidan 60 dan ortiq davlatda konsert dasturlari namoyish etildi, mahorat darslari o‘tkazildi.
“Lazgi” xalqaro raqs festivali qisqa fursatda jahonda munosib obro‘-e’tibor topayotgani, uning ishtirokchilari va muxlislari safi tobora kengayib, ta’bir joiz bo‘lsa, qadimiy o‘zbek diyori, Xorazm vohasining o‘ziga xos “tashrif qog‘ozi”ga aylanib borayotgani barchamizni xursand qiladi.
Bu yilgi festivalda ishtirok etayotgan xorijiy raqs jamoalari ham “Lazgi” raqsi asosida xoreografik dasturlar tayyorlab kelganlari alohida e’tiborga loyiq. Hech shubhasiz, o‘zbek xalqiga, uning noyob madaniyati va betakror qadriyatlariga hurmat ramzi bo‘lgan bunday olijanob intilishlar turli xalq va davlatlarni o‘zaro yaqinlashtirishga xizmat qiladi.
Fyestival doirasida o‘tkazilayotgan xalqaro konferensiya ham raqs san’ati bilan bog‘liq ilmiy-nazariy va amaliy masalalarni atroflicha muhokama qilishda muhim ahamiyat kasb etadi.
Qadrli festival qatnashchilari!
Ushbu go‘zal san’at bayramiga mezbonlik qilayotgan, ochiq osmon ostidagi muzey sifatida butun dunyoga tanilgan Xiva shahri 2024-yilda “Islom dunyosining turizm poytaxti” deb e’lon qilingan.
Albatta, sizlar festival kunlarida yurtimizning shonli tarixi va madaniyati, bugungi obod qiyofasini o‘zida mujassam etgan bu ko‘hna shahar bilan, bag‘rikeng va mehmondo‘st Xorazm ahli bilan yaqindan tanishasiz va ishonamanki, o‘xshashi yo‘q bu fusunkor yurtga, O‘zbekiston zaminiga mehringiz yanada ortadi.
Siz, azizlarni yana bir bor samimiy qutlab, barchangizga sihat-salomatlik, yangi ijodiy yutuqlar tilayman.
E’tiboringiz uchun rahmat!