"Avtomobilsiz kun": jamoat transportidan foydalanish targ‘ib qilindi
2025-02-27 11:00:00 / Yangiliklar
26-fevral, chorshanba kuni Toshkent, Nukus shaharlari, shuningdek, respublikaning barcha viloyatlari markazlarida navbatdagi "Avtomobilsiz kun" aksiyasi o‘tkazildi.
Aksiya davomida Ekologiya, atrof-muhitni muhofaza qilish va iqlim o‘zgarishi vazirligi xodimlari yurtdoshlarimizni atrof-muhitga zarar yetkazmaydigan jamoat transport vositalaridan foydalanishga chaqirishdi va bu borada shaxsiy namuna ko‘rsatishdi.
Ma'lumot uchun, transport vositalari atrof-muhitga yil davomida doimiy zarar yetkazadigan omil hisoblanadi. Bunday transport vositalaridan kamroq foydalansak, hech bo'lmaganda bir oyda bir marta voz kechsak, atmosferaga ko‘plab zararli tashlamalar tashlanishining oldini olgan bo‘lamiz.
Shunday ekan, har oyning to‘rtinchi chorshanbasida doimiy o‘tkaziladigan "Avtomobilsiz kun" aksiyasida faol ishtirok eting va atrof-muhit tozaligiga munosib hissa qo‘shing!