Uyushma tarkibida bugungi kunda 57 000 ta qurilish kompaniyasi bor. Uchrashuvda asosiy e'tibor yirik qurilish kompaniyalaridagi mavjud boʻsh ish oʻrinlariga yurtimizdan ishchilarni jalb qilish masalasiga qaratildi. 

Uyushma rahbari Pek Kvan Be Koreya oʻzbekistonlik mutaxassislar bilan ishlashga xohishi baland ekanini alohida qayd etdi. Ta'kidlanganidek, hozirda Koreya sanoati va qurilish sohasiga taxminan 232 000 ta ishchi oʻrni yetishmayapti. Undan qurilish yoʻnalishida ayni paytda 17 000 ta ishchiga ehtiyoj bor. Yaqin yillarda bu ko‘rsatkich yiliga 20 000 taga yetadi. 

Uchrashuvda Oʻzbekistonda mutaxassislarni Koreya qurilish texnologiyalari asosida birgalikda tayyorlash borasida ham fikr almashildi. Bu borada Koreya bandlik vazirligi bilan ham muzokaralar oʻtkazilishi taʼkidlandi.

Koreya Xorijiy sanoat ishchilari milliy ittifoqi raisi bilan bo‘lib o‘tgan muloqotda asosiy eʼtibor ushbu davlatda mavsumiy ish oʻrinlariga boʻlgan talab va uni qoplash masalasiga qaratildi. Toʻsiq boʻlayotgan mavjud muammolar muhokama qilindi. Ularni yechish yoʻllari oʻrtaga tashlandi. 

Xorijiy sanoat ishchilari milliy ittifoqi raisi alohida qayd etdiki, oʻtgan yilgi hisob-kitoblarga koʻra mavsumiy ishlarga 400 000 ta talab aniqlangan. Shundan bor-yoʻgʻi 40 000 nafar ishchi jalb qilingan. 

Bu yerda xorijiy ishchilarning ham masʼuliyatini oshirish kerakligiga toʻxtalib o‘tildi. Chunki, ish joyini tashlab ketish, tez-tez almashtirish kabi holatlar sodir boʻlgan. 

Aytish kerakki, hozirgi vaqtda Koreyadagi mavsumiy ishlarga oʻzbekistonliklar jalb qilinmaydi, ushbu xizmat safari davomida Kambagʻallikni qisqartirish va bandlik vaziri Koreya Respublikasining Mehnat va Adliya vazirliklarida ham uchrashuvlar oʻtkazishi rejalashtirilgan. 

Ular bilan boʻladigan muloqotda asosiy eʼtibor ishchi vizalarini olish jarayonini soddalashtirish, kvotalarni oshirish, ishchilarni birgalikda tayyorlash, yangi yoʻnalishlarni ochish kabi masalalarga eʼtibor qaratiladi.