Butunjahon shaxmat Olimpiadasi natijalari qanday?
2024-09-13 09:00:00 / Yangiliklar
Shu kunlarda Vengriya poytaxti Budapesht shahri 45-Butunjahon shaxmat Olimpiadasiga mezbonlik qilmoqda. Amaldagi Olimpiada chempioni hisoblangan O‘zbekiston erkaklar terma jamoasi dastlabki ikki turda g‘alabaga erishdi. Yosh grossmeysterlarimiz olimpiadaning 1-turida Trinidad va Tobago, 2-turda esa Misr terma jamoasini bir xilda 3,5:0,5 hisobida mag‘lubiyatga uchratib, chempionlik himoyasini muvaffaqiyatli boshlashdi. Ayollar terma jamoamiz esa 2-turda ham Angola vakillarini mag‘lub etib, yana bir muhim g‘alabaga erishdi. Shaxmatchilarimiz olimpiadadagi ishtiroklarini g‘olibona davom ettirmoqda.
Erkaklar:
O‘zbekiston - Misr 3,5 : 0,5
Nodirbek Abdusattorov - Favzi Adham 1:0
Nodirbek Yakubboev - Vagix Karim 1:0
Javohir Sindarov - Vafa Hamid 0,5 : 0,5
Shamsiddin Vohidov - Samex Sadek 1:0
Ayollar:
O‘zbekiston - Angola 3:1
Afruza Hamdamova - Xemima Paulo 1:0
Nilufar Yakubboeva - Esperansa Saxita 0:1
Umida Omonova - Ednasia Junior 1:0
Marjona Malikova - Luzia Pires 1:0
Eslatib o‘tamiz, 1-turda ham terma jamoalarimiz g‘alabaga erishgandilar. Demak, yigitlarda ham, qizlarda ham ochkolar soni 4 taga yetdi.
Bugun 13-sentabr kuni 3-turda yigitlarimiz Xorvatiya terma jamoasi bilan bahsga kirishsa, qizlar terma jamoamiz mezbon Vengriya bilan to‘qnash keladi. Bahslar Toshkent vaqti bilan 18:00 da start oladi.