XALQARO UCHRASHUV BO‘LIB O‘TDI
2024-09-18 18:00:00 / Yangiliklar
Bugun Oila va xotin-qizlar qo‘mitasi raisi Ozoda Parpiboyevaning Jahon bankining Yevropa va Markaziy Osiyoda ijtimoiy barqarorlik va inklyuzivlik bo‘yicha global amaliyot menejeri Helen Karlsson bilan uchrashuvi bo‘lib o‘tdi.
Samimiy muloqot ruhida bo‘lib o‘tgan uchrashuvda Jahon bankining mamlakatimizda ijtimoiy ahamiyatga molik loyihalarni amalga oshirishdagi bevosita ishtiroki va hamkorligi e’tirof etildi, shu jumladan, “O‘zbekistonda qishloq ayollarining iqtisodiy imkoniyatlarini yaxshilash” loyihasi amalga oshirilgani uchun minnatdorlik bildirildi.
O‘z navbatida mehmonlar tomonidan mamlakatimizda xotin-qizlar tadbirkorligini qo‘llab-quvvatlash bo‘yicha amalga oshirilayotgan ishlar alohida e’tirof etildi hamda yaqin hamkorlik uchun Oila va xotin-qizlar qo‘mitasiga minnatdorlik bildirildi.
Uchrashuvda ta’kidlanganidek, “Qishloq ayollarining iqtisodiy imkoniyatlarini yaxshilash” loyihasi aholining ijtimoiy himoyaga muhtoj qatlamlari, xususan, Jizzax va Farg‘ona viloyatlarining eng chekka tumanlaridagi ayollar tadbirkorligini qo‘llab-quvvatlash, ularga amaliy ko‘maklashishga qaratilgani, natijalari bilan juda ahamiyatlidir.
2021-yildan buyon Yaponiya Ijtimoiy Taraqqiyot Jamg‘armasi granti ko‘magida amalga oshirilayotgan ushbu loyihaning asosiy maqsadlaridan biri ehtiyojmand ayollarga jamoaviy tadbirkorlik ko‘nikmalarini o‘rgatish va har bir xotin-qizlar guruhini moliyalashtirishdan iboratdir.
Ayni paytda Jizzax va Farg‘ona viloyatlarida loyiha doirasida har bir hududda 8 nafardan xotin-qizlarni biznesga o‘rgatish va ularni biznesga yo‘naltirish bo‘yicha 8 nafar biznes-ekspert, shuningdek, 56 nafar ijtimoiy mobilizator faoliyat ko‘rsatmoqda.
Hozirgacha loyiha bo‘yicha Jizzax va Farg‘ona viloyatlaridagi 48 nafar xotin-qizlar guruhi to‘liq grant mablag‘larini olib, MCHJ shaklida korxonalar tashkil etdi, banklarda hisob raqamlarini ochdi, shuningdek, to‘qimachilik, to‘quvchilik, chorvachilik, sut mahsulotlarini qayta ishlash, pazandachilik, qandolatchilik kabi yo‘nalishlarda tadbirkorlik faoliyatini yo‘lga qo‘ydi.
Jizzax va Farg‘ona viloyatlarining sakkizta tumanida faoliyat yuritayotgan hududiy hokimiyatlar birlashmasi vakillaridan iborat “Baholash komissiyasi” tomonidan 51 nafar xotin-qizlar guruhining arizalari tegishli tartibda ko‘rib chiqilib, ayni paytda ular bilan shartnomalar tuzish va grant mablag‘larini belgilangan tartibda o‘tkazish uchun zarur hujjatlarni rasmiylashtirish ishlari yakuniga yetkazilmoqda.
Uchrashuv yakunida tomonlar o‘zaro hamkorlikda amalga oshiriladigan keyingi ishlarni muhokama qildilar.