Жамоатчилик кенгаши йиғилишида коррупцияга қарши курашиш ишлари муҳокама қилинди
2025-04-07 00:00:00 / Янгиликлар
Транспорт назорати инспекцияси ҳузуридаги Жамоатчилик кенгашининг жорий йилдаги дастлабки йиғилиши янги аъзоларни таништириш билан бошланди. Транспорт соҳасида самарали меҳнат қилаётган, инспекцияда ва бошқа ташкилотларда фаоллиги билан ажралиб турган бир гуруҳ янги аъзолар Кенгаш таркибига қўшилишди. Жамоатчилик кенгаши таркибида иккита – автомобиль ташувлари ва йўл қурилиши бўйича ишчи (эксперт) гуруҳлар ташкил этилгани маълум қилинди. Мазкур ишчи гуруҳлар инспекцияда олиб борилаётган ишларни кузатиб, жойига чиқиб ўрганиб, фаолиятни такомиллаштириш бўйича таклифларини бериб боришади. Кун тартибидаги дастлабки масала юзасидан инспекцияда коррупцияга қарши курашиш бўйича масъул шахс – Ўктам Очилов сўзга чиқиб, амалга оширилаётган ишлар юзасидан ахборот берди.
Даставвал, жорий ой – апрелда мамлакатимизда “Коррупцияга қарши курашиш ойлиги”га старт берилгани ва ойлик доирасида белгиланган вазифалар ва уларнинг амалга оширилиши юзасидан тўхталиб ўтди.
Инспекцияда рақамлаштириш ва ахборот технологияларини кенг қўллаш ҳамда инсон омилини камайтириш орқали соҳада коррупцияга қарши курашиш чоралари кўрилмоқда.
2024 йилда 4 та ахборот тизими ишлаб чиқилди, барча инспекторларга B 81 моделидаги янги авлод планшет қурилмалари харид қилинди. Инспекциядаги мавжуд штат бирликларида фаолият юритаётган барча бошқарув ходимлари ҳар йиллик манфаатлар тўқнашувини декларациялаш тартиб-таомилидан ўтказилди.
Бу орқали инспекция тизимидаги манфаатлар тўқнашуви ҳолатлари бартараф қилинди. Бу бўйича ишлар тизимли давом эттирилмоқда.
Амалга оширилган тизимли ишлар натижасида инспекцияда коррупцияга қарши курашишга оид қонунчилик ҳужжатларининг бузилишига йўл қўйилмади. Жамоатчилик кенгаши йиғилишида аъзолар ва инспекция ходимлари ўзларининг фикр-мулоҳазалари ва саволлари билан иштирок этишди.
Жамоатчилик кенгаши вакиллари инспекциянинг коррупцияга қарши курашиш борасидаги фаолиятини ижобий баҳолаб, рақамлаштириш бўйича бошланган ишларни янада такомиллаштириш юзасидан тавсиялар беришди.
Транспорт назорати инспекцияси
Ахборот хизмати