Respublika bo‘ylab avtobuslarning qish mavsumiga shaylik holati o‘rganilmoqda
2025-12-25 16:13:00 / Янгиликлар
Транспорт назорати инспекцияси ходимлари томонидан жамоат транспортида йўловчилар ташишни амалга ошираётган автобусларнинг ва микроавтобусларнинг қиш мавсумига шайлик ҳолатини аниқлаш бўйича республика бўйлаб кенг кўламли ўрганиш ишлари олиб борилмоқда. Мазкур текширувлар давомида автобусларнинг техник созлиги, жумладан, двигатель, тормоз тизими, иситиш ва вентиляция ускуналарининг узлуксиз ишлаши, аккумуляторлар ҳолати ҳамда шиналарнинг қишки мавсум талабларига мослиги синчиклаб кўздан кечирилмоқда.
Шунингдек, йўлларнинг музлаши ва қор ёғиши шароитида хавфсиз ҳаракатни таъминлаш мақсадида транспорт воситаларининг махсус сирпанишга қарши занжирлар билан таъминланганлиги, уларнинг сони ва яроқли ҳолати ҳам алоҳида текширилмоқда. Транспорт воситаларининг ташқи ва ички ёритиш чироқлари, авария ҳолатлари учун мўлжалланган ускуналар, ёнғин ўчириш воситалари ва биринчи тиббий ёрдам жиҳозларининг мавжудлиги ҳамда яроқли ҳолатда эканлиги текширилмоқда. Ҳайдовчиларнинг қишки шароитда хавфсиз ҳаракатланиш қоидаларига риоя этиши, белгиланган тезлик меъёрларига амал қилиши ва хизмат маданиятига эътибор қаратилаётгани ҳам профилактик тадбирларнинг муҳим йўналишларидан ҳисобланади.
Бундан ташқари, автобус салонларининг санитария-гигиена ҳолати, йўловчилар учун яратилган қулайликлар, жумладан, ўриндиқлар, эшиклар ва иситиш тизимининг самарадорлиги ўрганилмоқда. Ўтказилаётган ушбу тадбирлар қиш мавсумида аҳолига хавфсиз, барқарор ва сифатли жамоат транспорти хизматини кўрсатишни таъминлашга қаратилган.