Мактабгача таълим тизимини янада ривожлантириш, Муҳандислик мактаблари, бошланғич таълим ўқитувчилари учун 15 фоизлик устама, малака синовларида қатнашаётган 180 минг педагог — “Вазир соати”
2025-10-15 17:00:00 / Янгиликлар
Бугун Мактабгача ва мактаб таълими вазири Эъзоза Каримова бошчилигида соҳада олиб борилаётган қатор ислоҳотлар натижалари ҳамда келгусида амалга оширилиши лозим бўлган ишлар таҳлилига бағишланган “Вазир соати” бўлиб ўтди.
Танқидий-таҳлилий руҳда ташкил этилган тадбирда вазир ўринбосарлари, вазирлик масъуллари, ҳудудий бошқармалар ва тизим ташкилотлари раҳбарлари иштирок этди.
Йиғилиш аввалида мактабгача таълим тизимига доир жойларда олиб борилаётган жараёнлар масъуллар иштирокида кўриб чиқилди. Хусусан, болаларни мактабгача таълим билан қамраб олиш кўрсаткичлари, соҳани рақамлаштириш ҳамда боғчаларга йўлланма бериш жараёнлари тилга олинди.
Қайд этилганидек, қамров даражасини оширишда янги ўринларни яратиш билан бирга мавжуд ўринлардан оқилона фойдаланиш муҳим. Бунда айрим туман ва шаҳарлардаги бир йиллик мажбурий тайёрлов гуруҳларини шу ҳудудлардаги мактабларга кўчириш ва бошқа ишга солинмаган имкониятларни аниқлаш зарурлиги таъкидланди.
Шунингдек, боғчаларда болаларга таълим-тарбия жараёнларини сифатли ташкил этиш ва бунда “Илк қадам” ўқув дастури имкониятларидан фойдаланишнинг ўзига хос жиҳатлари санаб ўтилди.
Олис ва чекка ҳудудлардаги болаларни мактабгача таълим билан қамраб олишда “Ақлвой” мобиль гуруҳлари ва Илк ривожланиш марказлари фаолиятини янада жадаллаштириш муҳимлиги қайд этилди.
Шу билан бирга, давлат мактабгача таълим ташкилотларида аутсорсинг асосида соғлом овқатлантириш тизимини жорий этиш жараёнлари ҳам ҳудудий кўрсаткичлар асосида кўриб чиқилди. Масъулларга белгиланган масалаларни манзилли ўрганиб чиқиш ҳамда аниқланган камчиликларни тезкор ҳал этиш бўйича тегишли топшириқлар берилди.
Йиғилишда Ихтисослаштирилган таълим муассасалари агентлиги тизимида фаолияти йўлга қўйилаётган Муҳандислик мактабларини ташкил этиш жараёнлари тилга олиб ўтилди.
Айтилганидек, 2026 йил 1 январдан бошлаб ҳар йили умумтаълим мактаблари ўртасида Президент соврини учун «Илғор муҳандислик мактаби» миллий танлови ўтказилади ҳамда Республика босқичи ғолиблари учун хорижий давлатларга таълим саёҳати тақдим этилади.
Мазкур мактабларни аъло баҳоларга тамомлаган битирувчилар техника йўналишидаги олийгоҳларнинг 2-босқичига талабаликка қабул қилиниши режалаштирилмоқда.
Вазир соатида соҳага доир яна бир янгилик сифатида эндиликда миллий сертификатга эга бўлган бошланғич таълим ўқитувчилари учун ҳар ойда 15 фоизлик устама тўлаб борилиши айтиб ўтилди. Шу билан бирга бакалавр босқичини имтиёзли диплом билан битирган ҳамда таълим ташкилотларига ишга кирган педагогларга тўғридан-тўғри иккинчи, магистрларга биринчи малака тоифаси берилади.
Масъулларга мазкур ўзгаришларни қайд этувчи норматив-ҳуқуқий ҳужжат лойиҳасини тайёрлаш бўйича зарур вазифалар белгилаб берилди.
Навбатдаги масала сифатида жорий йил октябрь-ноябрь ойларида ўтказилиши режалаштирилган педагог кадрларнинг малака тоифа (тест) синовларига тайёргарлик жараёнлари таҳлил қилинди.
Таъкидланганидек, ушбу малака синовларида қатнашиш учун 240 мингдан ортиқ педагоглардан аризалар келиб тушган бўлиб, уларнинг 180 мингга яқини жараёнларда қатнашиши кутилмоқда.
Тизим масъуллари ҳамда ҳудудий раҳбарлар олдига аттестация синовлари давомида педагоглар учун зарур шарт-шароитлар яратиш, компьютер ва бошқа техник воситаларни соз ва узлуксиз ишлашини таъминлаш бўйича муҳим кўрсатмалар берилди.
Тадбир сўнггида вазирлик масъуллари ва ҳудудий бошқарма бошлиқларининг кун тартибидаги мавзуларга оид ҳисоботлари тингланди.