2025-2026 ўқув йили учун “Жасорат мактаблари”га 1-босқич қабул имтиҳонлари
2025-07-10 11:25:00 / Янгиликлар
Жорий йилнинг 10 июль куни Мактабгача ва мактаб таълими вазирлиги томонидан “Жасорат мактаблари” учун биринчи босқич қабул имтиҳонлари ташкил этилди.
Маълумот ўрнида: Давлатимиз раҳбарининг 2024 йил 15 ноябрдаги тегишли қарорига асосан 208 та (ҳар битта туман (шаҳар) да биттадан) “Жасорат мактаблари” фаолияти йўлга қўйилган.
Имтиҳонлар 1 сменада, 13 та ҳудудда (Тошкент шаҳри ва Тошкент вилояти учун имтиҳонлар “Узэкспомарказ”да) бўлиб ўтди. Унда номзодлар тест синовларини топширишди.
Қабул имтиҳонлари 2 босқичда бўлиб ўтади ва кейинги босқичда ўқувчилар жисмоний тайёргарликдан ўтишади.
“Жасорат мактаблари”га ҳужжатлар қабули жорий йилнинг
1-20 июнь кунлари онлайн шаклда (ariza.piima.uz сайти орқали) амалга оширилди. Унда жами 18 441 нафар номзоднинг ҳужжатлари қабул қилинди (13 206 нафари ўғил болалар,
5 235 нафари қизлар).
Қабул жараёнлари давомида 1206 қисқа рақамли Call-markaz фаолияти йўлга қўйилди.
Ҳужжат топширмоқчи бўлган талабгорларга амалий ёрдам кўрсатиш мақсадида ҳар куни соат 09:00 дан 18:00 гача фаолият юритадиган штаб ташкил этилди.
Жисмоний тайёргарлик синовларини ўтказиш учун 1 664 нафар (ҳар бир мактаб учун 8 нафардан кам бўлмаган) ҳакамлар ҳайъати таркиби шакллантирилиб, барча “Жасорат мактаблари”га етказилди.
2025-2026 ўқув йилида илк бор “Жасорат мактаблари”га икки босқичли саралаш орқали 5 408 нафар ўқувчи қабул қилинади.
Маълумот ўрнида, ушбу мактабларда математика, ЧҚБТ, тарих, жисмоний тарбия, чет тили, физика фанлари чуқурлаштирилган ҳолда ўқитилади.