Брифинг: “Yashil makon” umummilliy loyihasini yangicha yondashuvlar asosida tashkil etishdagi maqsad va vazifalar
2026-10-29 16:05:00 / Матбуот анжуманлари

Мақсад маҳаллаларда қулай экологик муҳит яратиш, дарахтларни асраш, кўчатларнинг яшовчанлигини ошириш, соҳада илм-фан, рақамли технологиялар ҳамда давлат, бизнес ва жамоатчилик ҳамкорлигини кучайтиришдан иборат.
Лойиҳа доирасида “3 - 30 - 300” халқаро стандарти жорий этилади.
2026 йил куз мавсумида 257 та “Яшил боғлар” ва “Яшил жамоат парклари” барпо этилади. 2030 йилга қадар бундай боғлар сони 1023 тага етказилади.
2030 йилга қадар ҳар бир туман ва шаҳарда камида 5 тадан узунлиги 10 километрдан кам бўлмаган сояли сайр кўчалари ташкил этилади.
Жорий мавсумда тўғри жой ва ҳудудга мос кўчат танлаш, вақтида суғориш ва тизимли парваришлашга асосий эътибор қаратилади.
Кўчат экиш мавсуми 1 ноябрдан Қорақалпоғистон Республикаси ва Хоразмда, 5 ноябрдан Бухоро ва Навоийда, 10 ноябрдан Андижон, Жиззах, Самарқанд, Сирдарё, Наманган, Тошкент, Фарғона вилоятлари ва Тошкент шаҳрида, 20 ноябрдан Сурхондарё ва Қашқадарёда бошланади.
Ушбу мавсумда куз-қиш ойларида намлик етарлилиги учун кўкарувчанлик юқори бўлиши ҳисобга олиниб, республика бўйича 140 млн туп кўчат экиш режалаштирилган.
Жорий йил 1 октябрдан бошлаб, аҳоли, жамоатчилик ва маҳалла еттилигига кўчатларни экиш, парваришлаш ва маҳалла буюртмасини шакллантиришда кўмаклашиш учун 4200 нафарга яқин “ўрмончи мураббий”лар республикадаги 8 992 та маҳаллага бириктирилди. Улар шу кунларда белгиланган вазифаларни амалга оширмоқда.
2027 йил 1 январдан ҳар бир маҳалла буюртмаси асосида “Маҳаллани яшиллаштириш” пакети жорий қилинади. “Маҳалла - ислоҳотлар буюртмачиси” тамойилига мувофиқ, Фармонда назарда тутилган маблағлар Ўзбекистон маҳаллалари уюшмаси тақсимотига асосан Маҳалланинг ижтимоий-иқтисодий муаммоларини ҳал этиш жамғармасига ўтказилади. Экология қўмитаси ҳузуридаги Ўрмон агентлиги томонидан маҳаллалар буюртмаси асосида “Яшил – маҳалла” дастури доирасида кўчатларни етказиб бериш, касаллик ва зараркунандалардан ҳимоя қилиш, органик ўғит, мулча ҳамда тежамкор суғориш воситалари билан таъминлаш хизматлари йўлга қўйилади.
2026 йил куз мавсумидан Қорақалпоғистон Республикаси Вазирлар Кенгаши, вилоятлар, Тошкент шаҳар ҳокимликлари тегишли вазирлик ва идоралар билан биргаликда ер майдони чекланган маҳаллаларда, кўп квартирали уйлар орасида, мактаб ва боғчалар ҳовлисида маҳалла микроўрмонларини ташкил этади. Ер ажратиш имкони бўлмаган ёки бетон ва асфальт қопламали ҳудудларда жамоатчилик кичик боғлари яратилади.
2026 йил учун 1 ноябрга қадар, келгусида ҳар йили 1 мартгача туман- шаҳарларнинг яшил дастурлари ишлаб чиқилади. Яшил боғ, сояли сайр кўчалари, кўллар ҳамда ёмғир, қор ва оқова сувларини тўплаб қайта ишлайдиган сув тежовчи суғориш тизимлари ташкил қилинади.
2027 йил 1 январдан аҳоли ташаббуслари асосида, “Яшил лот” тизими жорий этилади. Ҳудудларда мавжуд ер участкалари жисмоний ва юридик шахсларга шартнома асосида ном бериш орқали “яшил боғ” барпо этиш учун ажратилади. Ерлар уларга мулк сифатида ўтказилмайди, қурилиш, конструкция ўрнатиш ва бошқа фаолият турлари тақиқланади. Ҳудудлардан фақатгина мақсадли фойдаланилади.
