9-Май — Хотира ва қадрлаш куни ҳамда Ғалабанинг 81 йиллиги муносабати билан Шароф Рашидов туманида тантанали тадбир ташкил этилди
2026-05-07 10:30:00 / Янгиликлар
Тадбирда Шароф Рашидов тумани ҳокимлиги масъуллари, нуронийлар, ҳарбий хизматчилар, жамоатчилик вакиллари, уруш ва меҳнат фахрийлари ҳамда таълим муассасалари вакиллари иштирок этди.
Тадбир давомида Шароф Рашидов тумани ҳокими Асилбек Ашуров сўзга чиқиб, йиғилганларни 9-Май — Хотира ва қадрлаш куни ҳамда Ғалабанинг 81 йиллиги билан самимий муборакбод этди. Ўз нутқида юрт тинчлиги ва халқ осойишталиги йўлида жон фидо қилган аждодларимизнинг жасорати ҳамиша юксак эҳтиром билан ёдга олиниши таъкидланди.
Шундан сўнг “Мотамсаро она” ҳайкали пойига ҳамда Шароф Рашидов бюсти олдига гулчамбар ва гуллар қўйилиб, фахрийлар хотирасига ҳурмат бажо келтирилди.
9-Май — Хотира ва қадрлаш куни халқимизнинг мардлиги, жасорати ва фидойилигини ёд этадиган, кекса авлод вакилларига эҳтиром кўрсатадиган муҳим сана сифатида кенг нишонланмоқда.
Айни кунларда туман ҳудудларида сана муносабати билан маънавий-маърифий тадбирлар давом этмоқда.