Қувасой шаҳари ҳокимлиги

2026 йилнинг июнь ойи ҳамда жорий йилнинг олти ойи давомида Қувасой шаҳрида жиноятчиликка қарши курашиш ва унинг олдини олиш борасида қатор амалий ишлар амалга оширилди.

Олти ой давомида шаҳарда жами **96 та жиноят** қайд этилди. Шундан:

• **36 таси** олдини олиш мумкин бўлган жиноятлар;

• **58 таси** аниқланган жиноятлар;

• **2 таси** кибержиноятлар тоифасига киради.

Олдини олиш мумкин бўлган жиноятлар турлари таҳлил қилинганда қуйидаги ҳолатлар кузатилди:

• қотиллик – **3 та**;

• номусга тегиш – **3 та**;

• ўғирлик – **18 та**;

• фирибгарлик – **6 та**;

• тан жароҳати етказиш – **1 та**;

• йўл-транспорт ҳодисалари – **4 та**.

Жиноят содир этган шахслар тоифаси бўйича таҳлил натижаларига кўра:

• вояга етмаганлар томонидан – **2 та**;

• ёшлар томонидан – **19 та**;

• маст ҳолатда – **1 та**;

• муқаддам судланганлар томонидан – **6 та**;

• ишсиз шахслар томонидан – **1 та**;

• гуруҳ бўлиб содир этилган жиноятлар – **16 тани** ташкил этди.

**Ҳурматли фуқаролар!**

Инсон ҳаёти олий қадрият ҳисобланади. Ҳар бир фуқаронинг яшаш ҳуқуқи қонун билан кафолатланган. Қотиллик эса инсонни қасддан ҳаётдан маҳрум этиш бўлиб, жамият учун энг оғир жиноятлардан бири саналади.

Қотиллик жиноятларининг келиб чиқишига оилавий низолар, мастлик, моддий келишмовчиликлар, рашк, тажовузкорлик ҳамда ҳуқуқий маданиятнинг етарли даражада шаклланмаганлиги сабаб бўлиши мумкин. Аксарият ҳолларда бир лаҳзалик жаҳл ва ҳиссиётга берилиш тузатиб бўлмайдиган оқибатларга олиб келади.

Шу ўринда бир ҳолатни эслатиб ўтмоқчиман.

Жорий йилнинг 28 июнь куни соат 01:30 ларда келиб тушган хабарга кўра, Қувасой шаҳар Ҳамдўстлик маҳалласида яшовчи, 1999 йилда туғилган, икки нафар фарзанднинг отаси бўлган фуқаронинг хонадонига номаълум шахс кириб, унга ҳамда унинг вояга етмаган фарзандига ўткир тиғли жисм билан тан жароҳати етказиб, воқеа жойидан яширинган.

Олиб борилган тезкор-қидирув ва суриштирув тадбирлари натижасида мазкур оғир жиноят марҳумнинг шаръий никоҳдаги турмуш ўртоғи томонидан содир этилгани аниқланиб, гумонланувчи қўлга олинди. Мазкур ҳолат юзасидан Қувасой шаҳар прокуратураси томонидан Жиноят кодексининг 97-моддаси 2-қисми билан жиноят иши қўзғатилиб, Жиноят-процессуал кодексининг 221-моддаси тартибида процессуал чоралар кўрилди.

**Ҳурматли юртдошлар!**

Бугунги кунда жамиятимиз, айниқса ёшлар ва вояга етмаганлар келажаги учун энг долзарб ҳамда хавфли муаммолардан бири гиёҳвандлик воситалари ва психотроп моддалар билан боғлиқ жиноятлардир.

Сўнгги йилларда анъанавий гиёҳванд моддалар билан бир қаторда синтетик гиёҳванд воситаларнинг тарқалиши ортиб бормоқда. Улар инсон саломатлигига ўта хавфли бўлиб, қисқа вақт ичида кучли қарамликни юзага келтиради.

Унутманг, гиёҳвандлик — бу келажакни барбод қилувчи, оилаларни пароканда этувчи ва жамият хавфсизлигига жиддий таҳдид солувчи иллатдир. Бугунги ҳушёрлигимиз эртанги соғлом авлоднинг энг муҳим кафолатидир.

**Ҳурматли ота-оналар!**

Фарзандларингизнинг ёзги таътилни мазмунли ва хавфсиз ўтказишлари учун уларнинг йўл ҳаракати қоидаларига қатъий амал қилишларини назорат қилишингизни, шунингдек, вояга етмаганларнинг велосипед, электроскутер ва бошқа транспорт воситаларини белгиланган тартибга зид равишда бошқаришларига йўл қўймаслигингизни сўраймиз.

Ички ишлар органлари ходимлари доимо халқ билан бирга, халқ манфаатлари йўлида хизмат қилади. Шу билан бирга, жамоатчиликнинг фаол ҳамкорлиги биз учун ниҳоятда муҳимдир. Дунёда юз бераётган мураккаб вазиятлар барчамизни янада ҳушёр бўлишга, юртимиз тинчлиги ва осойишталигини кўз қорачиғидек асрашга ундаши лозим.

**Ҳурматли фуқаролар!**

Сизларни жиноят қурбонига айланиб қолмаслик, шунингдек ҳуқуқбузарлик ва жиноятларнинг олдини олиш йўлида ҳуқуқни муҳофаза қилувчи органлар билан ҳамкорлик қилишга чақирамиз.

**Огоҳ ва ҳушёр бўлинг! Тинчлик ва осойишталикни биргаликда асрайлик!**