Ўзбекистон Республикаси Вазирлар маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси

Қурилиш ва уй-жой коммунал хўжалиги соҳасида назорат қилиш инспекциясида Инспекция раҳбари бошчилигида йиғилиш бўлиб ўтди. Йиғилишда қурилиш материаллари сифатини назорат қилиш, қурилиш ишларини бошлаш учун юборилган аризаларни кўриб чиқиш жараёнларини рақамлаштириш, рухсат бериш тартиб-таомилларини такомиллаштириш ҳамда мурожаатлар билан ишлаш сифатини ошириш масалалари муҳокама қилинди. Хусусан, қурилиш объектларида фойдаланилаётган арматура, ғишт ва бошқа турдаги қурилиш материалларининг белгиланган стандартлар ҳамда техник талабларга мувофиқлигини таъминлаш, сифатсиз маҳсулотлардан фойдаланишнинг олдини олиш ва бу борадаги назорат тадбирларини янада кучайтириш зарурлиги қайд этилди. Шунингдек, давлатимиз раҳбари томонидан белгиланган вазифалардан келиб чиқиб, қурилиш соҳасидаги давлат хизматларини рақамлаштириш, қурилиш ишларини бошлаш учун аризаларни электрон шаклда қабул қилиш ва кўриб чиқиш жараёнларини соддалаштириш, уларнинг очиқлиги ва шаффофлигини таъминлаш бўйича амалга оширилаётган ишлар таҳлил қилинди. Бундан ташқари, жисмоний ва юридик шахсларнинг мурожаатларини ўз вақтида ва сифатли кўриб чиқиш, уларда кўтарилган масалаларни атрофлича ўрганиш ҳамда аниқланган муаммоларнинг қонуний ечимини таъминлаш бўйича олиб борилаётган ишлар ҳам муҳокама қилинди. Йиғилиш якунида белгиланган вазифаларнинг ўз вақтида ва сифатли бажарилишини таъминлаш юзасидан масъулларга тегишли топшириқлар берилди.