МУРОЖААТНОМА
2026-06-11 10:35:00 / Раҳбариятнинг баёнотлари ва нутқлари
Ассалому алайкум, азиз Наманганликлар!
Қадрли ота-оналар, маҳалла фаоллари!
Умидимиз ва суянчимиз бўлган азиз ёшлар!
Бугун мен сизларга Наманган шаҳар ҳокими сифатида эмас, балки шу муқаддас заминнинг бир фарзанди ва сизларга куйинувчи яқин инсонингиз сифатида, қалбимдаги энг катта хавотир ва муҳим бир масала юзасидан мурожаат қиляпман. Биз бугун Наманганни гуллаб-яшнаган, замонавий ва хавфсиз шаҳарга айлантириш, фарзандларимизга муносиб келажак яратиш йўлида катта ислоҳотларни амалга оширяпмиз. Бироқ, барча эзгу мақсадларимизга, миллатимиз генофондига, ёшларимизнинг порлоқ келажагига раҳна солувчи бир хавф борки, унга қарши барчамиз бир тану бир жон бўлиб курашмасак, кўзлаган марраларимизга эриша олмаймиз.
Бу — гиёҳвандлик ва заҳри қотил балосидир! Афсуски, бугун заҳри қотилнинг қиёфаси ўзгарди! Агар илгари гиёҳвандлик деганда анъанавий заҳри қотиллар тушунилган бўлса, бугунги кунда шиддатли ахборот асрида синтетик гиёҳвандлик воситалари, психотроп моддалар ва кучли таъсир қилувчи дори воситалари (халқ тилида "аптека" дорилари) ёшларимиз соғлиғига раҳна солмоқда. Энг ачинарлиси, бу заҳарлар интернет ва ижтимоий тармоқлар орқали хуфия тарзда тарқатилиб, содда, ҳали ҳаёт тажрибасига эга бўлмаган йигит-қизларимизни ўз домига тортмоқда. Биз бир нарсани тўғри англашимиз керак: биргина таблетка ёки кичик бир кимёвий модда — инсонни бир умрга ногирон қилиши, ақлдан оздириши ва энг даҳшатлиси, бевақт ўлимга олиб келиши исботланган ҳақиқатдир.
Азиз ва суюкли ёшларимиз!
Сизлар Наманганнинг эртанги куни, ота-онангизнинг умидисиз. Ота-онангиз сизнинг камолингизни кўраман деб туну кун меҳнат қилмоқда. Бир лаҳзалик сохта қизиқиш ёки дўстларнинг нотўғри даъвати туфайли ўз ҳаётингизни, соғлиғингизни ва келажагингизни барбод қилманг!
Сизнинг кучингиз — соғлом танангизда, билим олишга бўлган интилишингизда ва спорт майдонларида эришадиган ютуқларингиздадир. Биз сиз учун барча спорт майдончалари, кутубхоналар, ИТ-парклар ва тўгаракларни шай қилиб қўйганмиз. Заҳар изламанг — илм изланг, ҳунар ўрганинг, юртингизга муносиб фарзанд бўлинг!
Ҳурматли ота-оналар, маҳалла аҳли!
Фарзандимизнинг тарбияси, унинг кимлар билан дўстлашаётгани, бўш вақтини қандай ўтказаётгани ва ижтимоий тармоқларда нималар билан бандлигига бефарқ бўлмайлик. "Менинг болам ундай иш қилмайди" деган хотиржамликка берилмайлик. Агар маҳалламизда шубҳали ҳаракат қилаётган, заҳри қотил савдоси ёки тарқатилиши билан шуғулланаётган кимсаларни кўрсангиз, сукут сақламанг! Бизнинг бефарқлигимиз — кимнингдир фарзандини ўлимга маҳкум қилиши мумкин. "Бир болага етти маҳалла ота-она" деган нақл бежиз айтилмаган. Маҳалламиз оқсоқоллари, фаоллари, хотин-қизлар ва ёшлар етакчилари бу масалада ҳар қачонгидан ҳам ҳушёр ва талабчан бўлишлари зарур. Бизнинг қатъий позициямиз!
Наманган шаҳар ҳокимлиги ҳуқуқ-тартибот органлари билан биргаликда шаҳримиз ҳудудида гиёҳвандлик воситалари ва психотроп дориларнинг ноқонуний айланишига қарши аёвсиз кураш олиб боради. Биз соғлом ҳаёт учун курашда ҳеч кимга шафқат қилмаймиз! Мактаблар, коллежлар, олийгоҳлар ва маҳаллаларда тушунтириш ишларини янада кучайтирамиз. Аммо фақатгина маъмурий чоралар билан бу балони енгиб бўлмайди. Энг кучли қалқон — бу сиз билан бизнинг бирдамлигимиз, оиламиздаги соғлом муҳит ва жамиятимиздаги бефарқ бўлмаган қарашдир!
Қадрли Наманганликлар!
Келинг, гўзал Наманганимизни гиёҳвандликдан холи, соғлом ва тинч шаҳарга айлантириш йўлида бирлашайлик! Ҳар бир фарзандимизни кўз қорачиғидек асрайлик! Сизларга ва оилаларингизга соғлиқ, хотиржамлик ва бахт-саодат тилайман. Ёшларимизнинг йўли доимо ёруғ бўлсин!
Эҳтиром ила, Наманган шаҳар ҳокими Аюбхон Камалов