Миробод туманида маҳаллаларда хавфсиз муҳит яратиш бўйича амалга оширилаётган ишлар ўрганилди
2026-06-29 12:55:00 / Янгиликлар
Ташриф доирасида ишчи гуруҳ аъзолари туман ҳокими Анвар Сайфутдинов, туман прокурори Бобур Абдуллаев ҳамда ИИБ бошлиғи Улуғбек Насритдинов билан биргаликда "Шароф Рашидов" ва "Файзиобод" маҳаллаларида бўлиб, Ўзбекистон Республикаси Президентининг 2025-йил 3 январдаги ПҚ–1-сон қарорида белгиланган вазифаларнинг ижроси билан танишди.
Мазкур қарорга мувофиқ республика маҳаллаларида хавфсиз муҳитни шакллантириш, ҳуқуқбузарликларнинг барвақт олдини олиш тизимини янада такомиллаштириш ҳамда жамоат тартибини мустаҳкамлашга қаратилган чора-тадбирлар белгиланган.
Ўрганиш давомида Миробод тумани ҳокимининг жамоат хавфсизлигини таъминлаш, ҳуқуқбузарликлар профилактикаси, "маҳалла еттилиги" фаолияти самарадорлигини ошириш ҳамда маҳаллаларда хавфсиз муҳит яратиш бўйича амалга оширилаётган ишлар юзасидан ҳисоботи тингланди.
Шунингдек, криминоген вазиятни барқарорлаштириш, масъул идоралар ўртасидаги ҳамкорликни кучайтириш, ҳуқуқбузарликлар содир этилишига ҳамда коррупсиявий ҳолатларга шароит яратаётган омилларни ўз вақтида аниқлаш ва бартараф этиш масалаларига алоҳида эътибор қаратилди.
Учрашувда сўзга чиққан Қутбиддин Бурханов барча даражадаги раҳбарлар белгиланган вазифаларнинг сифатли ва ўз вақтида ижросини таъминлаши, шунингдек, амалга оширилаётган ишлар устидан доимий ва самарали назоратни йўлга қўйиши зарурлигини таъкидлади.
Ўрганиш якунлари бўйича тезкор ечим талаб этадиган муаммоли масалалар белгиланди. Масъул раҳбарларга фаолиятни янада такомиллаштириш юзасидан аниқ топшириқ ва тавсиялар берилди. Шунингдек, ишчи гуруҳ раҳбари маҳалла фаоллари, жумладан "маҳалла еттилиги" вакилларининг саволларига жавоб қайтарди.