Тошкент шаҳар прокурори Миробод туманида яширин иқтисодиётга қарши олиб борилаётган ишлар ҳолатини ўрганди
2026-01-21 14:30:00 / Янгиликлар
Ташриф давомида бир қатор объектлар, хусусан, “ТОШКЕНТ УНИВЕРМАГИ” (ЦУМ), меҳмонхона ва умумий овқатланиш шахобчалари фаолияти кўздан кечирилди.
Туманда умумий овқатланиш соҳасида 460 та субъект фаолият юритади. Ўрганишлар натижасида 96 та корхонада 18,3 млрд сўмлик солиқ базаси яширилгани аниқланиб, бюджетга қўшимча тушумлар таъминланди. Шунингдек, 22 та корхонада 54 нафар норасмий ходим қонунийлаштирилди.
“ТОШКЕНТ УНИВЕРМАГИ” АЖ (ЦУМ)да 45 та тадбиркорлик субъекти фаолият юритиб, улардан 21 таси юридик шахс, 24 таси якка тартибдаги тадбиркорлардан иборат. Савдо соҳасида 35 та, умумий овқатланишда 3 та, хизмат кўрсатишда эса 4 та субъект фаолият кўрсатади. Барча субъектларда онлайн назорат касса машиналари ва савдо терминаллари тўлиқ жорий қилинган.
Миробод туманида меҳмонхона фаолияти билан шуғулланувчи жами 107 та объект мавжуд. Белгиланган “Йўл харитаси” доирасида 46 та меҳмонхона ўрганилиб, 18 та меҳмонхонада 5,4 млрд сўмлик солиқ базаси яширилгани аниқланди ва 337 млн сўм қўшимча солиқ ҳисобланди. Шунингдек, 10 та меҳмонхонада 22 нафар норасмий ходим қонунийлаштирилди. 4 та меҳмонхонада 18 нафар меҳмон “Е-mehmon” тизимига киритилмаган, 12 та меҳмонхонада эса “Е-mehmon”га киритилган, аммо ОНК орқали ўтказилмаган 290 та ҳолат аниқланиб, 177,6 млн сўмлик савдо тушуми қўшимча равишда ҳисобга олинди.
Хусусан, Тошкент шаҳар прокурори томонидан кўздан кечирилган Т.Шевченко кўчасида жойлашган “HOTEL MANOR” МЧЖ томонидан 2025 йилда 5 881,8 млн сўмлик савдо тушуми амалга оширилган ва меҳмонлар белгиланган тартибда “Е-mehmon” тизими орқали рўйхатга олинган.
Ўрганишлар сўнгида Тошкент шаҳар прокурори ишчи йиғилиш ўтказди. Унда Миробод туман прокурори ва солиқ инспекцияси раҳбарлари томонидан яширин иқтисодиётга қарши курашиш юзасидан амалга оширилаётган ишлар юзасидан ҳисоботлар тингланди ва келгусида самарали чора-тадбирларни амалга ошириш масалалари муҳокама қилинди.