Тошкент шаҳар Миробод тумани ҳокимлиги

Бугун, 22 декабр куни Миробод тумани ҳокимлиги катта мажлислар залида туманда қиш мавсумини беталофат ўтказиш, маҳаллаларда юзага келаётган муаммоли ҳолатлар ва уларнинг ечимларига бағишланган кенгайтирилган йиғилиш бўлиб ўтди.

Йиғилиш Миробод тумани ҳокимининг ўринбосари Фарҳод Нажмиддинов раислигида ўтказилиб, унда маҳаллаларга хизмат кўрсатувчи бошқарув сервис компаниялари раҳбарлари, тумандаги барча коммунал ташкилотлар раҳбарлари, шунингдек, ҳокимликнинг тегишли йўналиш раҳбарлари иштирок этди.

Тадбир аввалида Ф.Нажмиддинов туманда қиш мавсумига тайёргарлик ҳолати ҳамда жойларда мавжуд муаммоларга алоҳида тўхталиб ўтди. Хусусан, сўнгги кунларда ёғган қор ёғингарчилиги оқибатида маҳаллаларда олиб борилган қордан тозалаш ҳамда қум-туз аралашмасини сепиш ишлари жараёнида айрим бошқарув сервис компаниялари томонидан етарли даражада куч ва воситалар сафарбар этилмагани, аҳоли хавфсизлигини таъминлаш бўйича берилган топшириқларга совуққонлик билан ёндашилгани танқидий қайд этилди.

— Бундай мураккаб об-ҳаво шароитида барча мутасадди ташкилотлар ҳокимлик билан ҳамкорликда мавжуд ҳолатни қатъий назоратга олиши, аҳоли хавфсизлигини таъминлаш бўйича зарур чораларни ўз вақтида кўриши шарт. Фуқаролардан келиб тушаётган мурожаатлар ижроси қатъий назоратга олинади, бепарволикка йўл қўйган масъулларга нисбатан тегишли чоралар кўрилади, — деди ҳоким ўринбосари.

Йиғилиш давомида қиш мавсумини ўтказиш жараёнида вужудга келаётган муаммоларни мунтазам таҳлил қилиш, аниқланган камчиликларни тезкор бартараф этиш бўйича туман ҳокимлиги ҳузурида ташкил этилган тезкор штаб фаолиятига алоҳида эътибор қаратилди. Қайд этилганидек, айни пайтда аҳолидан келиб тушаётган мурожаатларни қабул қилиш, рўйхатга олиш ва уларни тезкор ҳал этиш мақсадида штаб фаолият олиб бормоқда. Тегишли коммунал ташкилотлар вакиллари ушбу штабга масъул қилиб бириктирилган.

Шунингдек, йиғилишда бошқарув сервис компаниялари раҳбарларининг қиш мавсумига тайёргарлик ҳолати, мавжуд муаммолар ва уларни бартараф этиш бўйича кўрилаётган чора-тадбирларга доир ҳисоботлари тингланди.

Ф.Нажмиддинов тақдим этилган маълумотларни таҳлил қилиб, ҳар бир муаммони жойига чиққан ҳолда ўрганиш, уларни қисқа муддатларда ҳал этиш бўйича тегишли мутасаддиларга аниқ топшириқлар берди.

Йиғилиш якунида қиш мавсуми билан боғлиқ масалалар юзасидан ижтимоий тармоқлар орқали келиб тушаётган мурожаатларнинг ўз вақтида кўриб чиқилиши ва ижроси таъминланиши бўйича масъулларга қатор тавсиялар берилди.