Тошкент шаҳар Миробод тумани ҳокимлиги

Маълумки, 2025-йил июнь ойида Миробод тумани ҳокими Анвар Сайфутдинов томонидан “Жасорат мактаби”нинг моддий-техника базасини янгилаш ва замонавий инфратузилма яратиш мақсадида 500 миллион сўм маблағ ажратилган эди. Ушбу маблағ доирасида таълим масканида қуйидаги махсус машғулот зоналари барпо этилди:

• ўқ отиш тири,

• тўсиқлар йўлаги,

• гимнастика шаҳарчаси,

• воркаут (спорт) майдончаси.

Шунингдек, “Жасорат синфлари” учун зарур бўлган барча жиҳозлар тўлиқ янгиланиб, ўқувчилар ҳозирги талабларга мос шароитда таълим ва машғулот олиш имкониятига эга бўлдилар.

Юртбошимизнинг 2024-йил 15-ноябрдаги ПҚ-393-сон қарори асосида 214-мактаб “Жасорат мактаби” сифатида белгиланган. Мазкур лойиҳа доирасида ўқувчилар учун 26 та квота ажратилган.

Жасорат синфларининг асосий йўналишлари

“Жасорат мактаби” ўқувчи-ёшларда ҳарбий-ватанпарварлик туйғусини мустаҳкамлаш, интеллектуал, жисмоний ва маънавий ривожланишни таъминлашга қаратилган. Синфлар фаолияти доирасида қуйидаги вазифалар ижро этилади:

• ҳарбий-спорт мусобақалари, интеллектуал викториналар ва кўрик-танловларни мунтазам ўтказиш;

• робототехника, “Келажак ўйинлари”, тиббий тайёргарлик, ҳуқуқий саводхонлик ва миллий спорт турлари бўйича тўгаракларга ўқувчиларни жалб этиш;

• ўқувчиларда миллий қадриятларга ҳурмат, ватанпарварлик, садоқат, ҳалоллик ва миллий ғурур туйғуларини шакллантириш;

• ёшларни мамлакатимиз тарихи, буюк аждодларимиз мероси ва миллий қаҳрамонлар жасорати асосида фаол фуқаролик позициясига эга шахслар сифатида тарбиялаш.

Яратилган замонавий шарт-шароит – ёшлар келажаги йўлида хизмат қилади

Янгиланган “Жасорат мактаби” ўзининг замонавий инфратузилмаси, ҳарбий-амалий машғулотлар учун мослаштирилган махсус майдонлари ва инновацион таълим ёндашуви билан ёшларнинг интеллектуал, жисмоний ва маънавий салоҳиятини янада юксалтиришга хизмат қилади. Лойиҳадан кўзланган мақсад — Ватанга содиқ, интизомли, иродали ва масъулиятли ёшларни тарбиялаб етиштиришдир.

Тантанали маросим доирасидаги чиқишлар

Тадбирда ўқувчилар ва мактаб жамоаси томонидан тайёрланган мазмунли маданий-амалий дастур намойиш этилди. Жумладан:

1. Фахрий қоровуллар чиқиши,

2. 154-мактаб ўқувчилари томонидан “Жадидлар” қўшиғи ижроси,

3. қўл жанги бўйича намойиш машғулотлари,

4. 158-мактаб рақс жамоасининг чиқишлари.

Тадбир иштирокчилари “Жасорат мактаби”нинг аҳамияти, яратилган имкониятлар ва лойиҳанинг келгуси босқичлари юзасидан ўз фикр ва мулоҳазаларини билдирдилар.