Қашқадарё вилояти Миришкор тумани ҳокимлиги

Ўзбекистон касаба уюшмалари ҳаракатининг 120 йиллиги муносабати билан мамлакатимизнинг турли ҳудудларида бир қатор маданий-маърифий тадбирлар, спорт мусобақалари ҳамда хайрия акциялари ўтказилмоқда. Ана шундай эзгу ташаббуслардан бири жорий йилнинг 25-май куни Миришкор туманида ҳам амалга оширилди.

Миришкор тумани ҳокимлиги ҳамда Ўзбекистон давлат муассасалари ва жамоат хизмати ходимлари касаба уюшмаси Миришкор тумани кенгаши ҳамкорлигида давлат фуқаролик хизматчилари ва уларнинг оила аъзолари учун қадимий ва бетаакрор Самарқанд шаҳрига сайёҳат ташкил этилди. Ушбу сайёҳат нафақат маънавий ҳордиқ, балки жамоа ўртасидаги ҳамжиҳатликни мустаҳкамлаш, миллий қадриятларимиз ва тарихий меросимизни янада чуқурроқ ўрганишга хизмат қилди.

Сайёҳат иштирокчилари орасида туман ҳокимлиги мутахассис ва техник ходимлари, Оила ва хотин-қизлар бўлими ҳамда Ёшлар ишлари бўлими ходимлари ва уларнинг яқинлари бўлиб, улар Самарқанднинг тарихий зиёратгоҳ ва обидалари билан яқиндан танишиш бахтига муяссар бўлишди.

Дастлаб сайёҳатчилар Регистон майдонини зиёрат қилишди. Ўзининг бетаакрор меъморчилик услуби, ноёб нақш ва безаклари билан дунё аҳлининг эътиборини ўзига жалб этиб келаётган ушбу майдон тарихи ҳақида сўзлаб берилди. Улуғбек, Шердор ва Тиллакори мадрасалари ҳақида қизиқарли маълумотлар берилиб, ҳар бир иншоотнинг ўзига хослиги таъкидланди.

Кейинги манзил Амир Темур мақбараси — Гўри Амир мажмуаси бўлди. Бу ерда буюк саркарда ва давлат арбоби Соҳибқирон Амир Темур бобомизнинг ҳаёти ва фаолияти, жаҳон тарихидаги ўчмас излари ҳақида ҳикоялар тингланди. Сайёҳатчилар мақбаранинг меъморий ечими, ундаги нақш ва ёзувлар, безаклар билан яқиндан танишиб, буюк аждодимизнинг номи абадий барҳаёт эканини яна бир бор ҳис этишди.

Шунингдек, Бибихоним масжиди ва Шоҳи Зинда мажмуаси каби тарихий масканлар ҳам зиёрат қилинди. Ҳар бир зиёрат жойида иштирокчиларга бу обидалар тарихий қадри, яратилиш сабаби ва улар ортидаги афсоналар ҳақида сўзлаб берилди. Айниқса, Шоҳи Зинда мажмуасидаги меъморий обидалар ва ундаги муқаддас қадамжолар иштирокчиларга катта таассурот қолдирди.

Сайёҳат давомида иштирокчилар учун маданий дастур ҳам ташкил этилиб, Самарқанд шаҳрининг замонавий ва тарихий манзаралари бўйлаб экскурсия уюштирилди. Оила аъзолари ва фарзандлар учун қувноқ ўйинлар ва танловлар ташкил қилиниб, барчага байрамона кайфият улашилди.

Мазкур сайёҳат туман фуқаролик хизматчиларининг машаққатли меҳнатини қадрлаш, уларнинг бўш вақтларини мазмунли ўтказиш ва оилавий қадриятларни мустаҳкамлашга хизмат қилди. Иштирокчилар ташкилотчиларга миннатдорлик билдириб, бундай ташаббуслар тез-тез ўтказилиб туришини исташди.

Миришкор тумани ҳокимлиги ва касаба уюшмаси кенгаши томонидан бундай маънавий-маърифий тадбирларнинг келгусида ҳам давом эттирилиши режалаштирилган.