Миришкор тумани ички ишлар бўлими бошлиғи, подполковник Ғайрат Хайдаровнинг “Хавфсиз ва соғлом юрт” профилактика тадбири ойлиги муносабати билан фуқароларга мурожаати
2025-12-09 08:00:00 / Раҳбариятнинг баёнотлари ва нутқлари
Ассалому алайкум, ҳурматли тумандошлар!
Юртимизда 20-ноябрдан 20-декабрга қадар жиноятчиликнинг олдини олиш, криминоген вазиятни барқарорлаштириш ҳамда фуқаролар хавфсизлигини таъминлаш мақсадида “Хавфсиз ва соғлом юрт” профилактика тадбири ойлиги ўтказилмоқда. Ушбу ойликнинг бош мақсади – ҳуқуқбузарликлар профилактикасини кучайтириш, аҳолининг ҳуқуқий онгини, ҳушёрлик маданиятини янада оширишдир.
Бугун жамиятимизда жиноятчиликка қарши кураш фақатгина давлат органларининг эмас, балки ҳар бир фуқаромизнинг ҳам бурчи ва масъулиятидир. Ҳар биримизнинг огоҳлигимиз, қонунийликка садоқатимиз – эртанги кунимиз хавфсизлиги ва фаровонлигининг мустаҳкам пойдеворидир.
Ҳурматли юртдошлар!
Шахсий ва мулкий манфаатларингизни ҳимоя қилиш, фирибгарлик ва алдовларнинг олдини олиш мақсадида қуйидагиларга эътибор қаратишингизни сўраймиз:
Фуқаролик-ҳуқуқий муносабатларда эҳтиёткорлик
Ҳар қандай турдаги олди-сотди, гаров, ижара ёки бошқа фуқаролик-ҳуқуқий битимларни фақат нотариал тартибда расмийлаштиринг. Ҳужжатларнинг юридик кучга эга бўлиши ва низолар келиб чиқишининг олди олиниши учун бу энг самарали йўлдир.
Мулкингизни ҳимоя қилинг
Уй-жой ва хонадонларингизни кузатув камералари, ташвиш тугмалари, газ анализаторлари, ёнғин ҳақида огоҳлантирувчи мосламалар билан жиҳозлаб, ички ишлар органларининг қўриқлаш хизмати хизматларидан фойдаланишингизни тавсия этамиз.
Қўриқлаш хизмати: 1131
Йўл ҳаракати хавфсизлиги – умумий масъулият
Алкоголли ичимлик истеъмол қилган ҳолда транспорт воситасини бошқариш қонун билан қатъиян тақиқланган. Бундай ҳуқуқбузарлик содир этилган тақдирда шахс:
- маъмурий жавобгарликка тортилади;
- БҲМнинг 40 баравари миқдорида жарима солинади ёки 15 суткагача маъмурий қамоқ қўлланади;
- транспорт воситасини бошқариш ҳуқуқидан 1 йил 6 ойдан 3 йилгача маҳрум этилиши мумкин.
Ҳолат такрор содир этилса, ушбу қилмиш жиноий жавобгарликка сабаб бўлади.
Экологик талабларга риоя қилинг
Фойдаланаётган транспорт воситаларингизнинг экологик кўрсаткичлари меъёрларга мос бўлиши шарт. Атмосферага зарарли моддаларнинг меъёрдан ортиқ чиқарилиши қонунчиликда белгиланган тартибда жавобгарликка сабаб бўлади. Шу боис, автомобилингизни ўз вақтида техник кўрик ва диагностикадан ўтказинг.
Киберхавфсизлик – замон талаби
Бугунги кунда кибержиноятлар тобора кўпайиб бораётганини инобатга олиб, қуйидагиларга қатъий амал қилинг:
- Банк карталари орқали тўловни фақат расмий иловалар ва ишончли платформалар орқали амалга оширинг.
- Бегона шахсларга ҳеч қачон смс-код, ПИН-код ёки банк маълумотларини айтманг.
- Телеграм ёки бошқа мессенжерлар орқали юборилган .апк форматдаги номаълум файлларни очманг – бу зарарли дастур бўлиши мумкин.
Ҳурматли фуқаролар!
Сизнинг огоҳлигингиз, қонунларга ҳурматингиз ва ҳамкорлигингиз Миришкор туманида тинчлик, осойишталик ва барқарорликни янада мустаҳкамлайди. Ҳар биримизнинг ҳушёрлигимиз, масъулиятли муносабатимиз – “Хавфсиз ва соғлом юрт” барпо этиш йўлидаги энг катта ҳиссамиздир.
Ўз хавфсизлигимизни ўзимиздан бошлайлик!
Юртимиз фаровонлиги, тинчлиги ва келажаги йўлида биргаликда ҳаракат қилайлик.
Ҳурмат билан,
подполковник Ғайрат Хайдаров
Миришкор тумани ИИБ бошлиғи