Инновацион ривожланиш агентлиги томонидан Кореянинг Фан ва технология сиёсати институти (STEPI) билан ҳамкорликда К-Инновацион ҳамкорлик дастури доирасида “Технопарклар бўйича Ўзбекистон миллий стратегияси” грант лойиҳаси амалга оширилмоқда.
2025-08-26 15:45:00 / Янгиликлар
Мазкур лойиҳа 2025–2027-йилларга мўлжалланган бўлиб, унинг доирасида Ўзбекистондаги технопарклар фаолиятини ривожлантириш мақсадида Корея тажрибаси асосида миллий стратегия ишлаб чиқилиши режалаштирилган. Шунингдек, Кореянинг фан ва технология сиёсатини ривожлантириш модели ва тажрибасини маҳаллий технопаркларга татбиқ этиш ҳам кўзда тутилган.
Ҳозирда лойиҳа доирасида Ўзбекистонлик мутахассислар малакасини ошириш ва технопарклар бўйича Корея тажрибасини ўрганиш мақсадида Инновацион ривожланиш агентлиги вакилларидан иборат делегация Корея Республикасида хизмат сафарида бўлиб турибди.
Дастурнинг биринчи куни Ўзбекистон ва Корея ўртасида инновацион ҳамкорликни мустаҳкамлаш ҳамда Ўзбекистонда технопарклар ва стартап экотизимини ривожлантиришда қимматли халқаро тажрибаларни ўртоқлашишга бағишланди. Делегация аъзолари Кореянинг илғор илм-фан ва технология сиёсати, технопарклар тарихи ва ривожланиши, шунингдек, Корея Технопарклар Ассоциациясининг инновацион экотизимдаги ўрни ҳақида бир қатор мутахассислик маърузаларини тингладилар.
Маърузачилар қаторида бу соҳада халқаро эътирофга эга бўлган кореялик экспертлар — доктор Сунг Чул Чунг, доктор Деок Соон Йим ва доктор Ҳюн Ёунг Ёун иштирок этдилар.
Маърузалар якунида Корея моделини Ўзбекистон иқтисодиёти ва географик шароитида қўллаш имкониятлари ва қийинчиликлари, технопаркларни барпо этиш ва уларни молиялаштиришнинг самарали механизмлари, шунингдек, инновацион инфратузилмани ривожлантиришда давлат-хусусий шерикликнинг ўрни каби мавзуларда савол-жавоблар ва жонли муҳокамалар бўлиб ўтди.
Кейинги кунларда делегациянинг Сеул, Чеонгжу, Сежонг, Геонгсан ва Поҳанг шаҳарларида жойлашган Кореянинг етакчи технопарклари, инновацион марказлари ҳамда илмий-тадқиқот муассасаларига ташриф буюриш режалаштирилган.