Қозоғистон ва Ўзбекистон ўртасида энергия самарадорлиги соҳасида ҳамкорлик мустаҳкамланмоқда
2026-04-27 14:30:00 / Янгиликлар
Остона шаҳрида ўтказилган Минтақавий экологик саммит доирасида Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги ҳамда Қозоғистон Республикасининг Энергия тежаш ва энергия самарадорлигини ошириш соҳасини ривожлантириш миллий институти ўртасида стратегик ҳамкорлик тўғрисидаги Меморандум имзоланди.
Мазкур ҳужжат икки давлат ўртасида энергия тежаш, энергетика ресурсларидан оқилона фойдаланиш ҳамда энергия самарадорлигини ошириш йўналишларида тизимли ва узоқ муддатли ҳамкорликни ривожлантиришга қаратилган.
Учрашув давомида Институт Бошқаруви раиси Елдос Абаканов ҳамда Энергия самарадорлиги миллий агентлиги директори Зиёвиддин Бадриддинов Қозоғистон ва Ўзбекистон ўртасидаги ҳамкорликнинг устувор йўналишларини батафсил муҳокама қилдилар.
Музокаралар давомида томонлар ўзаро ҳамкорликнинг устувор йўналишларига алоҳида эътибор қаратиб, аввало тажриба алмашиш ва институционал ҳамкорликни изчил кенгайтириш масалаларини муҳокама қилдилар. Шу билан бирга, энергия тежаш ва энергия самарадорлигини оширишга қаратилган қўшма лойиҳаларни амалга ошириш, уларни самарали молиялаштириш ва амалиётга жорий этиш механизмлари кўриб чиқилди. Томонлар, шунингдек, мазкур соҳада умумий ёндашувларни ишлаб чиқиш, замонавий бошқарув механизмларини жорий этиш ҳамда илғор халқаро тажрибаларни интеграция қилиш орқали ҳамкорлик самарадорлигини янада ошириш муҳим эканини таъкидладилар.