Зарафшонда энергия самарадор технологияларни жорий этиш бўйича тушунтириш ишлари олиб борилди
2026-03-26 17:25:00 / Янгиликлар
Навоий вилоятининг Зарафшон шаҳрида Энергия самарадорлиги миллий агентлиги томонидан энергия самарадорлигини ошириш ва энергия ресурсларидан оқилона фойдаланишга бағишланган семинарлар ташкил этилди.
Тадбирлар давомида иштирокчиларга энергия самарадор технологияларни жорий этиш, биноларда энергия сарфини камайтириш усуллари ҳамда энергия аудитининг аҳамияти ҳақида маълумотлар берилди. Шунингдек, энергия истеъмолини таҳлил қилиш орқали харажатларни қисқартириш имкониятлари кенг тушунтирилди.
Семинарларда Ўзбекистон Республикаси Вазирлар Маҳкамасининг “Энергия сервис хизматлари бозорини шакллантириш ҳамда аҳоли уй-жойларининг энергия самарадорлиги оширилишини рағбатлантириш чора-тадбирлари тўғрисида”ги 673-сонли қарори мазмун-моҳияти юзасидан тушунтиришлар берилди. Унга кўра, аҳоли ва тадбиркорлик субъектлари учун бир қатор имтиёз ва субсидиялар жорий этилгани таъкидланди. Жумладан, уй-жойларда энергия аудитини ўтказиш харажатларини қоплаш, қуёш панеллари ва гелиоколлекторлар, иссиқлик насосларини харид қилиш ва ўрнатиш учун ажратиладиган субсидиялар, шунингдек, “яшил” кредитлар бўйича қўллаб-қувватлаш механизмлари мавжудлиги қайд этилди.
Бундан ташқари, Энергия самарадорлигини ошириш рақамли платформаси орқали субсидияларга онлайн ариза топшириш ҳамда энергия самарадор қурилмаларни харид қилиш ва ўрнатиш механизми очиқ ва шаффофлиги ҳақида ҳам маълумот берилди.
Таъкидлаш керакки, бундай семинарлар аҳоли ва тадбиркорлар ўртасида энергия ресурсларидан оқилона фойдаланиш ва исрофдан тийилишга асосланган турмуш тарзи ва феъл-атворни шакллантиришга хизмат қилади.