Энергия самарадорлиги миллий агентлиги ходимларига ISO 14001 халқаро сертификатлари топширилди
2026-03-25 16:50:00 / Янгиликлар
Тошкент шаҳрида бошланган “Марказий Осиё: Унумдорликдан фаровонлик сари. Минтақавий мулоқот” халқаро форуми доирасида экологик менежмент тизимлари бўйича халқаро сертификатлар топшириш маросими бўлиб ўтди.
Энергия самарадорлиги миллий агентлигининг бир гуруҳ ходимлари ISO 14001 халқаро стандартига мувофиқ сертификатларни қўлга киритди. Ушбу натижа агентлик жамоасининг экологик бошқарув тизимлари, энергия самарадорлиги ва барқарор ривожланиш йўналишларидаги билим ва малакаси халқаро даражада эътироф этилганини англатади.
TÜV Nord Cert GmbH компаниясининг минтақавий менежери Удо Кубитз томонидан Халқаро аккредитация ташкилоти иштирокидаги амалий таҳлил ўтказилди ва сертификатлар топширилди. Мазкур компания иштирокида ўқув машғулотлари ҳам ташкил этилди.
Таъкидлаш жоизки, ISO 14001 сертификати мутахассисларнинг атроф-муҳитни муҳофаза қилиш, ресурслардан оқилона фойдаланиш ҳамда экологик хавфсизликни таъминлаш борасидаги замонавий ёндашувларни чуқур эгаллаганини тасдиқлайди.