Ўзбекистон 2028 йилгача ўз сунъий йўлдошини учирмоқчи
Ўзбекистон 2028-йилгача ўз илмий-техник сунъий йўлдошини орбитага чиқаришни режалаштирмоқда, деб хабар берди “Ўзбеккосмос” космик тадқиқотлар агентлиги ходими Муҳиддин Ибрагимов.
Маълумотларга кўра, ҳозирда мамлакат Илон Маскка тегишли Американинг SpaceХ компанияси билан учиришни ташкил этиш бўйича музокаралар олиб бормоқда. Шунингдек, мутахассис халқаро ишга туширишлар жадвали ва илгари банд қилинган вақтинчалик ойналар билан боғлиқ чекловларни ҳисобга олиш муҳимлигини таъкидлади.
Муҳиддин Ибрагимовнинг айтишича, сунъий йўлдошларни коинотга чиқариш муддатлари 2-3 йил олдин тасдиқланади, шунинг учун ўз вақтида шартномалар тузиш ва техник шартларни тайёрлаш муҳимдир. Таъкидлаш керак, лойиҳа доирасида 2024-йилда ўзбекистонлик етти нафар талаба сунъий йўлдош концепциясини ишлаб чиқиш, уни йиғиш ва учиришга тайёрлаш учун Кюсю технология институтида магистратура босқичида таҳсил олишни бошлаганди.
Талабалар 2027 йилгача ўқишни тугатишлари режалаштирилган, бир йилдан сўнг эса қурилмани коинотга учириш мумкин бўлади.