Халқ қабулхоналарига мурожаат қилиш тартиби қандай?
Фуқаролар халқ қабулхоналарига ўзлари дуч келаётган муаммолар ечимини топиш мақсадида, оғзаки ёки ёзма шаклда мурожаат қилишлари мумкин. Фуқаро, маълум бир муаммони ҳал этиш мақсадида, ўзи истиқомат қиладиган ҳудуддаги халқ қабулхонасига бориб тўғридан тўғри мурожаат қилиш ҳуқуқига эга ҳисобланади. Агарки, мурожаат этувчи фуқаро, ўзи истиқомат қиладиган ҳудуддаги халқ қабулхонасига бориб мурожаат қилиш имкониятига эга бўлмаса, 1000 қисқа рақамлари орқали халқ қабулхонасининг виртуал мурожаатлар билан ишлаш бўлимига телефон орқали ўз аризаларини қолдиришлари мумкин. Халқ қабулхоналарига мурожаат қилиш тўловсиз шаклда амалга оширилади. Мурожаат этувчи фуқаро, шахсини тасдиқловчи ҳужжат асосида халқ қабулхоналарига мурожаат этиши талаб этилади. Шунингдек, халқ қабулхоналари томонидан фуқаролар мурожаатлари 15 кундан бир ой муддат ичида кўриб чиқилади.
Жисмоний шахснинг мурожаатида жисмоний шахснинг фамилияси (исми, отасининг исми), унинг яшаш жойи тўғрисидаги маълумотлар кўрсатилган бўлиши керак.
Юридик шахснинг мурожаатида юридик шахснинг тўлиқ номи, унинг жойлашган ери (почта манзили) тўғрисидаги маълумотлар кўрсатилган бўлиши керак.
Жисмоний ва юридик шахснинг мурожаатида давлат органининг, ташкилотнинг аниқ номи, мурожаат юборилаётган мансабдор шахснинг лавозими ва (ёки) фамилияси (исми, отасининг исми) кўрсатилган, шунингдек мурожаатнинг моҳияти баён этилган бўлиши керак.
Мурожаатларда мурожаат этувчиларнинг электрон почта манзили, алоқа телефонлари ва факслари рақамлари кўрсатилиши мумкин.
Мурожаатлар давлат тилида ва бошқа тилларда берилиши мумкин.
Ёзма мурожаат мурожаат этувчи жисмоний шахснинг имзоси ёки мурожаат этувчи юридик шахс ваколатли шахсининг имзоси билан тасдиқланган бўлиши лозим. Жисмоний шахснинг ёзма мурожаатини мурожаат этувчининг имзоси билан тасдиқлаш имкони бўлмаган тақдирда, бу мурожаат уни ёзиб берган шахснинг имзоси билан тасдиқланиб, унинг фамилияси (исми, отасининг исми) ҳам қўшимча равишда ёзиб қўйилиши керак.
Мурожаат этувчиларнинг вакиллари орқали берилган мурожаатларга уларнинг ваколатларини тасдиқловчи ҳужжатлар илова қилинади.
Ўзбекистон Республикаси Президенти Халқ қабулхоналарининг ва Виртуал қабулхонасининг асосий вазифалари қуйидагилардан иборат:
аҳоли билан тўғридан-тўғри мулоқотни ташкил этиш, уларнинг ҳуқуқлари, эркинликлари ҳамда қонуний манфаатларини тўлақонли ҳимоя қилишга қаратилган, мурожаатлар билан ишлашнинг самарали тизими фаолиятини таъминлаш;
мурожаат қилишга оид конституциявий ҳуқуқнинг сўзсиз амалга оширилиши учун шароитлар яратиш;
Ўзбекистон Республикаси Президентининг Халқ қабулхоналарига ва Виртуал қабулхонасига келиб тушган мурожаатларнинг тўлиқ, холисона ва ўз вақтида кўриб чиқилишини ташкил этиш;
Ўзбекистон Республикаси Президентининг Халқ қабулхоналарига ва Виртуал қабулхонасига келиб тушган ҳамда тегишлилиги бўйича давлат органларига, ташкилотларга юборилган мурожаатларнинг кўриб чиқилиши устидан тизимли мониторинг ва назоратни амалга ошириш;
жисмоний шахсларнинг ва юридик шахслар вакилларининг қабулларини ўтказиш, шу жумладан видеоконференцалоқа воситасида ўтказиш.