“PANDEMIYA” BADIIY FILMINING PREMYERASI
2024-09-11 10:20:00 / Yangiliklar
Real voqelikka asoslangan ushbu film Kinematografiya agentligi buyurtmasiga asosoan “Yagona cinema” studiyasi hamda Sog‘liqni saqlash vazirligi hamkorligida tasvirga olingan. Filmda COVID-19 virusi yurtimizga kirib kelgan ilk kunlardanoq davlatimiz rahbariyati tomonidan amalga oshirilgan keng ko‘lamli chora-tadbirlar, ayniqsa, kasallikka qarshi kurashishda fidoiylik ko‘rsatgan shifokorlarning qahramonliklari aks ettirilgan. Unda pandemiya davridagi yo‘qotishlar, shifokorlarning o‘z kasbi va burchini hamma narsadan ustun qo‘yib ko‘rsatgan jonbozligi ochib berilgan.
Filmning asosiy voqealari Zangiota tumanidagi sanitariya-epidemiologik osoyishtalik va jamoat salomatligi markazida suratga olingan bo‘lib, rollarni xalqimizning sevimli ijodkorlari – Matyoqub Matchonov, Saidkomil Umarov, Aysenem Yusupova, Erkin Bozorov, Tamara Hazratqulova, Xudoyorxon Ahmadjonov kabi san’atkorlar ijro etishgan.
– Film menda juda katta taassurot qoldirdi, – deydi vazirlikning Inson resurslarini rivojlantirish va boshqarish boshqarmasi boshlig‘i o‘rinbosari, xotin-qizlar qo‘mitasi raisi D.Alikulova. – Darhaqiqat, koronavirus balosi nafaqat oddiy insonlar orasida, balki uni davolovchi shifokorlar orasida ham katta yo‘qotishlarga sabab bo‘ldi. Filmda shifokorlarimizning tojdor virusni yengishda xuddi frontdagi askarlardek kurashganligiga guvoh bo‘ldim. Darddan forig‘ bo‘lgan insonlarning quvonchini ko‘rib shifokorlarimizning mashaqqatli mehnati va metin irodasiga tasannolar aytdim.
Axborot xizmati