Хокимият Ташкентского района
ЯНГИ ЎЗБЕКИСТОН ҚИЁФАСИ: ТОШКЕНТ ТУМАНИНИНГ УЙҒОНИШ ВА ЮКСАЛИШ ФАСЛИ
Вақт — тинимсиз оқар бир дарё, дейдилар. Бироқ инсоният тарихида шундай қутлуғ даврлар, лаҳзалар бўладики, ундаги йиллар асрларга татигулик мазмун, шиддат ва улуғворлик билан йўғрилади. Бугун биз нафас олаётган, гувоҳи ва иштирокчиси бўлиб турган Янги Ўзбекистон замини ана шундай тарихий эврилишлар, янгиланишлар ва юксалишлар пойдевори устига барпо этилмоқда. Муҳтарам Президентимиз раҳнамолигида юртимизнинг ҳар бир гўшасида, олис қишлоқларию марказий шаҳарларида кечаётган кенг кўламли бунёдкорлик нафаси Ватанимизнинг мутлақо янги қиёфасини яратди. Мана шу нурафшон қиёфанинг энг ёрқин, жозибали ва кўркам аксларидан бирини пойтахтимизнинг бош дарвозаси, меҳнатсевар ва бағрикенг инсонлар юрти — Тошкент тумани мисолида теран ҳис этиш мумкин.
Бу ерда ҳар тонг янги бир эзгулик ташаббуси билан бошланади, ҳар куни қайсидир маҳалланинг ободлик кўчаси яратилади, замин қаъридан обиҳаёт чиқарилади, янги саноат ва хизмат кўрсатиш масканлари ишга тушиб, юзлаб ёшлар ва хотин-қизларнинг кўзларида эртанги кунга бўлган мустаҳкам ишонч учқунлари порлайди. Ушбу китоб мана шу шиддатли қадамларнинг, кўнгиллардаги уйғонишларнинг бадиий ва ҳужжатли ифодасидир.
Ўтган ўн йиллик зафарли йўл: Мудроқликдан уйғониш сари
Агар атиги ўн йил муқаддам ортга назар ташласак, Тошкент туманининг ўша пайтдаги ижтимоий-иқтисодий манзараси бугунги шиддатли ривожланиш ва ободликдан анча йироқ бўлганини юракда оғриқ билан эслаймиз. Йўлларнинг нотекислиги ва чанг-тўзонлиги, ичимлик суви таъминотидаги ўн йиллаб давом этган узилишлар, эскирган, пастқам ва нураган файссиз уйлар, чекка маҳаллалардаги ижтимоий муаммолар аҳолининг ҳақли эътирозларига сабаб бўлар эди. Энг ачинарлиси, Тошкент туманининг ўзига хос, аниқ шаклланган ва кўркам бир маркази йўқ эди. Туман гўёки улкан пойтахтнинг соясида қолиб кетган, ўзининг улкан салоҳиятини, иқтидорини ва гўзаллигини тўлиқ намоён эта олмаётган мудроқ бир ҳудудни ёдга соларди.
Бироқ, сўнгги ўн йиллик халқимизнинг тарихига туб бурилиш ва миллий юксалиш даври бўлиб кирди. Ислоҳотларнинг шиддатли ва инсонпарвар шабодаси Тошкент туманининг ҳам ҳар бир хонадонига, ҳар бир маҳалласига, одамлар қалбининг туб-тубига кириб борди. Ҳудуднинг ижтимоий-иқтисодий қиёфасини тубдан янгилаш бўйича беқиёс ишлар бошланди. Инфратузилма замон талаблари асосида қайта қурилди, ички йўлларга асфальт ётқизилди, тадбиркорликка кенг йўл очилди. Бу шунчаки қурилиш ва ободонлаштириш эмас, бу — элнинг руҳиятидаги, инсонларнинг дунёқарашидаги улкан маънавий уйғониш эди. Халқ ўз давлатига, ўз эртасига иқрор бўлди, йиллар давомида сўнган умидлар қайта тикланиб, Тошкент тумани меҳнаткашлари улкан марралар сари бел боғладилар.
Рақамлар ортидаги инсон қадри ва замонавий бунёдкорлик
Ортда қолган йиллар мобайнида олиб борилган кенг кўламли лойиҳалар доирасида Келес йўли кўчасининг икки тарафида халқимиз учун энг зарур ва замонавий бўлган ижтимоий объектлар — муҳташам Давлат хизматлари маркази, ёшларнинг билим ва истеъдод масканига айланган Ёшлар маркази, янги Маданият саройи, муаззам Амфитеатр, барча қулайликларга эга Универсал спорт мажмуаси, Хотира майдони ва кўркам сайилгоҳлар барпо этилди. Илгари мавжуд бўлган эски, пастқам ва яшаш учун ноқулай уйлар ўрнида 41 та кўп қаватли замонавий турар жойлар қад ростлади. Бу кўркам уйлардаги 2 минг 536 та шинам хонадонда бугун 11 мингдан зиёд туман аҳли тинч, осойишта ва фаровон ҳаёт кечирмоқда.
Янги марказ нафақат ободлик, балки аҳоли учун улкан даромад ва иш ўрни масканига ҳам айланди. Мазкур кўп қаватли уйларнинг биринчи қаватлари ва ертўлаларида ташкил этилган 270 та савдо, умумий овқатланиш, маиший ва молиявий хизматлар кўрсатиш шохобчаларида 1 минг 350 нафар маҳаллий ёшлар ва хотин-қизлар доимий иш билан таъминланди. Инсон саломатлиги ва ижтимоий ҳимояси ҳамиша эътибор марказида бўлгани боис, туманда замонавий Марказий шифохона, туманлараро перинатал маркази, янги мактабгача таълим ташкилоти, «Инсон» ижтимоий хизматлар маркази ҳамда туман тарихи музейи фойдаланишга топширилди.
Тарихий бурилиш: 2024 йил октябрь ташрифининг нурафшон саҳифаси
Тошкент туманининг кўп минг йиллик тарихий солномасида олтин ҳарфлар билан битиладиган, ҳудуд ҳаётини мутлақо янги босқичга олиб чиққан бир муаззам сана борки, у ҳақда гапирганда ҳар бир тумандошимизнинг қалби фахр ва чексиз миннатдорликка тўлади. 2024 йилнинг 14 октябрь куни Ўзбекистон Республикаси Президенти Шавкат Миромонович Мирзиёевнинг Тошкент туманига амалга оширган тарихий ташрифи туман ҳаётида бутунлай янги бир саҳифани очиб берди. Давлат раҳбарининг бу заминга қадами шиддат билан ривожланаётган туман учун янги бир куч, сўнмас илҳом ва улуғвор мақсадлар машъали бўлди. Президентимиз туманга келиб, шунчаки бунёдкорлик ишлари билан танишиб қолмади, балки оддий одамларнинг қалб ришталарига қулоқ тутди, уларнинг орзу-истакларини тинглади ва туманни замонавий қиёфасини янада яхшилаш бўйича улуғвор режасини белгилаб берди.
Бунинг натижасида, охирги икки йилнинг ўзида туманда 218 километр ички йўллар таъмирланиб, асфальт ётқизилди ва равон йўлларга айлантирилди. Келажакка қаратилган юксак одимлар қаторида туманда 97 гектар майдонда ташкил этилаётган индустриал технопарк ва унда амалга ошириладиган 350 миллион долларлик юқори қўшилган қийматли лойиҳалар Тошкент туманини вилоят ва республиканинг энг қудратли иқтисодий локомотивларидан бирига айлантириши шубҳасиздир.
Олий мезон — Халқни рози қилиш
Мамлакатимизда кечаётган бу улуғвор жараёнларнинг, туб ислоҳотларнинг бош ғоявий асоси ва юраги — инсон қадрини улуғлаш, халқни ҳаётдан рози қилиш тамойилига таянади. Ўзбекистон Республикаси Президенти Шавкат Мирзиёев таъкидлаганларидек:
“Биз Янги Ўзбекистонни барпо этишда “Халқ давлат идораларига эмас, давлат идоралари халқимизга хизмат қилиши керак” деган инсонпарвар ғояга амал қиляпмиз”
Давлатимиз раҳбарининг ушбу теран фалсафий ва инсонпарвар фикрлари бугун Тошкент тумани мисолида ўзининг тўлиқ, яққол амалий тасдиғини топмоқда. Ҳар бир амалга оширилаётган ислоҳот, ҳар бир қад ростлаётган иншоот, ҳар бир тортилаётган обиҳаёт қувури айнан шу заминда яшаётган оддий инсонларнинг, меҳнаткаш халқимизнинг фаровонлиги ва бахту саодати учун хизмат қилмоқда. Давлат идораларининг халқ билан тўғридан-тўғри, самимий мулоқот ўрнатиши туманни янги марралар сари етакламоқда.
Тошкент тумани ҳокими
Сардорбек Эргашев.