Hákimiyat haqqında
Qońırat rayonı haqqında qısqasha maǵlıwmat
Qońırat rayonı Ózbekstan Respublikasınıń arqa-batıs bóliminde jaylasqan bolıp, 1927-jılı 3-iyulde shólkemlestirilgen. Rayon aymaǵı Ózbekstan Respublikası ulıwma aymaǵınıń 12 procentin, Qaraqalpaqstan Respublikası aymaǵınıń bolsa 46 procentin quraydı. Qońırat rayonı Túrkmenstan hám Qazaqstan Respublikaları, sonday-aq, Moynaq, Kegeyli hám Qanlıkól rayonları menen shegaralas.
Rayonnıń tiykarǵı ekonomikalıq rawajlanıw baǵdarları sharwashılıq hám neft-ximiya sanaatı bolıp tabıladı.
Rayonnıń ulıwma maydanı 76,0 mıń kvadrat kilometrdi quraydı. Rayonda 21 máhálle, 5 posyolka hám 13 awıl puqaralar jıyını bar.
2025-jıl 1-iyul jaǵdayına bola, rayonda turaqlı jasawshı xalıq sanı 137,8 mıń adamdı quraǵan. Bul kórsetkish jıldıń basına salıstırǵanda 1,2 mıń adamǵa yamasa 0,9 procentke artqan. Sonnan:
erkekler — 70,7 mıń adam;
hayal-qızlar — 67,1 mıń adam;
qalalıq jerlerde jasawshılar — 87,0 mıń adam;
awıllıq jerlerde jasawshılar — 50,8 mıń adam.
Rayonda jámi 39 puqaralar jıyını hám 28 093 xojalıq bar. Sonday-aq, 52 ulıwma bilim beriw mektebi, 94 mektepke shekemgi bilimlendiriw shólkemi hám 2 kitapxana jumıs alıp baradı.
Rayonnıń batıs bólimin Ústirt tegisligi iyelegen bolıp, jer astı baylıqlarınıń tiykarǵı bólimi usı aymaqta jaylasqan. Bul jerde háktas, por, gips, mergel, as duzı, neft, gaz kondensatı hám basqa da paydalı qazılmalardıń iri kánleri bar. Shoxpaxta, Quwanısh, Aqchulaq, Úshsay hám Urga maydanlarında gaz kánleri ashılǵan. Urga káni 1995-jılı magistral gaz qubırına jalǵanǵan bolıp, xalıq hám ekonomika talapların támiyinlewde úlken áhmiyetke iye.
Rayonda Barsakelmes hám Qarawımbet duz kánleri de bar. Barsakelmes duz kániniń uzınlıǵı 75 km, eni 70-72 km, tereńligi bolsa 30-60 metrdi quraydı. Onıń ulıwma maydanı 1 000 kvadrat kilometrge teń.
Bul duz kánlerinen sanaat maqsetlerinde paydalanıw ushın Ózbekstan Respublikası Ministrler Kabinetiniń 1995-jıl 2-marttaǵı 79-sanlı qararına muwapıq Qońırat soda zavodı qurılǵan hám paydalanıwǵa tapsırılǵan.