KOICA xalıqaralıq shólkeminiń ekspertleri Qońırat rayonında jańa IT oray qurıw joybarın kórip shıqpaqta
2026-11-18 20:00:00 / Jańa texnologiyalardan paydalanıw

KOICA xalıqaralıq shólkeminiń ekspertleri Qońırat rayonında jańa IT oray qurıw joybarın kórip shıqpaqta
Qaraqalpaqstan Respublikasınıń 7 rayonında zamanagóy IT orayların qurıw hám jaslardı málimleme texnologiyaları hám sanlı kónlikpeler boyınsha oqıtıwdı názerde tutıwshı joybar sheńberinde Qońırat rayonında da ámeliy jumıslar alıp barılmaqta.
Bul joybar sheńberinde KOICA (Koreya xalıqaralıq birge islesiw agentligi) shólkeminiń ekspertleri Qońırat rayonına kelip, rayonda jańa IT oray qurıw ushın ajıratılǵan jer maydanları menen tanıstı. Sonday-aq, rayon hákimi B.Madaminov ekspertler menen birgelikte IT oray qurıw ushın usınıs etilip atırǵan jer maydanların kózden ótkerip, joybardı ámelge asırıw boyınsha pikir alıstı hám imkaniyatlar haqqında maǵlıwmat berdi. Sapar dawamında aymaq jaǵdayı, infrastruktura hám qurılıs jumısların ámelge asırıw imkaniyatları úyrenildi.
Sonday-aq, ekspertler rayon jasları menen ushırasıp, olardıń málimleme texnologiyalarına bolǵan qızıǵıwshılıǵı, zamanagóy kásiplerdi úyreniw umtılısı hám IT tarawındaǵı keleshektegi rejeleri haqqında sáwbetlesti. Sáwbetlesiw dawamında jaslar ushın zamanagóy IT bilimlendiriw imkaniyatların jaratıw, olardıń bilim hám kónlikpelerin rawajlandırıw máselelerine ayrıqsha itibar qaratıldı.
Bul joybar Qońırat rayonında sanlı bilimlendiriwdi rawajlandırıw, jaslardıń zamanagóy kásiplerdi iyelewi hám keleshekte IT tarawında básekige shıdamlı qánigeler bolıp jetilisiwine xızmet etedi.







