RÁSMIY MÚNÁSIBET
2026-11-07 18:30:00 / Министрлик

Sociallıq tarmaqlarda ( https://www.instagram.com/reel/DfcGn_uI4Ew/?exln=OXRmcGpsNXY4MW1p ) Qońırat-Moynaq avtomobil jolınıń ońlawǵa mútáj jaǵdayı hám ayırım bólimlerinde transport qurallarınıń eki tárepleme háreketleniwine tosqınlıq etip atırǵan jaǵdaylar boyınsha bildirilgen múrájat úyrenip shıǵıldı.
Maǵlıwmat ushın, Qońırat rayonındaǵı D-231B "Qońırat qalası aylanba jolı" avtomobil jolınıń ulıwma uzınlıǵı 10,7 km di quraydı. Sonnan 5,0-10,7 km aralıǵındaǵı 5,7 km bólegi ońlawǵa mútáj jaǵdayda.
Usı jol bólegin ońlaw maqsetinde Qaraqalpaqstan Respublikası Avtomobil jolları bas basqarması tárepinen joybarlaw-smeta hújjetlerin islep shıǵıw boyınsha tiyisli jumıslar ámelge asırılǵan. Dáslepki esap-sanaqlarǵa bola, joldıń 5-10 km aralıǵın aǵımdaǵı ońlaw ushın 8,9 mlrd sum qarjı zárúr ekenligi anıqlanǵan.
Biraq, joybardı ámelge asırıwdı qarjılandırıw máselesi sheshilmegenligi sebepli joybarlaw-smeta hújjetlerin islep shıǵıw hám ekspertizadan ótkeriw processleri tolıq juwmaqlanbaǵan.
Usı múnásibet penen bul joldıń 5,0 km den 10,7 km ge shekemgi bolǵan 5,7 km bólegin ońlaw ushın 10,0 mlrd sum qarjı ajıratılıwı kerek ekenligi belgilendi.
Sonday-aq, juwapker shólkemlerge joldıń ońlaw jumısları alıp barılıp atırǵan bóleginde jol shetlerine tógilgen shebenlerdi tártipke keltiriw, transport qurallarınıń qáwipsiz hám úzliksiz háreketleniwine tosqınlıq etip atırǵan jaǵdaylardı saplastırıw boyınsha tapsırmalar berildi.
Orınlanǵan jumıslardıń nátiyjeleri hám joldı ońlaw boyınsha qosımsha maǵlıwmat beriledi.
Aydawshılardan jol belgileri boyınsha háreketleniwdi, belgilengen tezlikke ámel etiwdi hám ońlaw jumısları alıp barılıp atırǵan aymaqta abaylı bolıwdı soraymız.
Puqaralarımızdıń múrájatları, jol háreketi qáwipsizligin támiyinlew máseleleri turaqlı itibarda.
