QOŃÍRAT RAYONÍNDA ULÍWMA MILLIY DIKTANT TAŃLAWÍ ÓTKERILDI
2026-10-05 17:00:00 / Министрлик
21-oktyabr - Ózbek tili bayramı kúni múnásibeti menen búgin Qońırat rayonı Ruwxıy-aǵartıwshılıq orayında mámleketlik tildi rawajlandırıw, ana tilimizge bolǵan húrmet-itibardı jáne de arttırıw, xalıqtıń sawatlılıǵın arttırıw maqsetinde ulıwma milliy diktant tańlawı ótkerildi.
Tańlawda "Ústirtgaz qazıp shıǵarıw basqarması" xızmetkerleri belsene qatnastı. Qatnasıwshılar ózbek ádebiy tiliniń imla hám grammatikalıq normaları boyınsha bilimlerin sınaqtan ótkerip, diktant jazıw arqalı sawatlılıq dárejelerin kórsetti.
Bul ilaj mámleketlik tildiń abırayı hám statusın jáne de arttırıw, jámiyette ana tilge bolǵan húrmetti bekkemlew, sonday-aq, puqaralardıń jazba sawatlılıǵın arttırıwǵa xızmet etti.
Ilaj dawamında ana tilimizdiń baylıǵı, onıń milliy ózligimiz hám ruwxıy qádiriyatlarımızdaǵı sheksiz ornı ayrıqsha atap ótildi.
Ózbek tili bayramı kúni múnásibeti menen shólkemlestirilgen bul tańlaw qatnasıwshılarda ana tiline bolǵan mehir hám itibardı jáne de kúsheytip, mámleketlik tildi rawajlandırıw jolındaǵı iygilikli baslamalardıń ámeliy kórinisine aylandı.